Zapytać o wolny termin - w piontek jada podziałać co ze suportym, bo już pierońsko mi coś w nim szczylo, jak obracom korbami. Ale po przeszło 16000km to chyba nic niynormalnego.

Musza syrwis odwiydzić w końcu.. Niy mom specjalistycznych kluczy heh

Taki tam wypadzik nad zalyw i do Rud podziwać se na kolejka, stare wagony itp. :) Jak na razie siyrpiyń fest słaby rowerowo... Ale do czasu.

No! W końcu udało mi se zrealizować jedyn z takich powalonych cylów, czyli przepyndalowani pół kafla km'ów zarozki po przijściu ze szychty :> We piontek chciołech sie beztoż wyspać, ale obudziłech sie kajś po 8-yj... :/ Przigotowołech koło i inne rzeczy. Do roboty na 2. zmiana. Prziszłech przed 22. Byłech w Tesco po chlyb krojony i szekolady :P Bo coś w nocy trza wcinać.


Zjodłech potrawa miszczuf :D  I obowionzkowo ze 2 kawy, bo na pewno by mie zmulać zaczyło..


No i o 23 przijechołech na punkt spotkania z Pawłym. Napisołech na srejbukowyj grupie rybnickigo kolarstwa, kiery by sie pisoł na ta rajza (w grupie ponad 100 osób). Yno Paweł sie zgłosił (i jeszcze jedno osoba, kieryj jednak termin niy pasowoł). Weekend, zarombisto pogoda, ale widocznie wiynkszość woli kulać średnie 35 na kole na dystansach 150km. Tako je prowda.

No nic, pyndalowalmy se elegancko w strona wielkich hołd hehe. Najgorzyj było bez te zadupia miyndzy Raciborzym, a Prudnikiym. Niby drogi wojewódzkie, a stan - tragiczny momyntami. Ale chocioż Paweł poopowiadoł, jak to montowoł monitoring na poddaszu u gościa, u kierego ponoć straszyło.. i że do dzisio niewiadomo, co i jak ;]

Przed Prudnikiym właśnie krótko pauza na obleczynie sie i jedzonko. 

Była 4:30 jakoś i tympyraturka 12,5'. Ale już kole 6-yj było 18' heh.. Wtedy mielimy zrobione 150km i zaczyła sie piyrwszo hopka.




Podjazd o fest słabym nachylyniu, co mie trocha dziwiło..
Na zjeździe zaś spadło do 12,5' eehh


Tu już Lądek Zdrój (abo Stronie Śląskie? hmm niy pamiyntom)


I Bjedronka i zakupy.


Trocha mie zaczynało zmulać, to już doba bez spanio.. Ale że dziyń se zaczynoł, to wiedziołech, że mie to przejdzie. 

Sam już na szczycie kolejnego podjazdu; musza prziznać, że ścianka już konkretno! Ale wioło niysamowicie fest! Wiater z południowego-zachodu. Jakiś 900mnpm :)


Dojechalimy do DK33. Niestety Paweł już musioł kierować sie du dom, życie. A jo za to 8km na południe po AŻ jedna gmina. Bo jakby miała wyglondać mojo mapka z takim "niedopałkiym"? :P Drugi roz bych sam już raczyj niy przijyżdżoł.


Oczywiście jechołech pod lekki wznos terynu i pod wichura hehe, średnio 18km/h. Ale już nazot kole 30-ki.

Bystrzyca Kłodzka:


I na Polanica i bocznom drogom do Szczytnyj. Myślołech, że bydzie hopka, ale o dziwo w miara płasko.
Za to fest długi podjazd był na DK8, kiery im wyżyj, tym bardzij nachylony.


Ale potym fajnie sie jechało na luzie do Kudowyj :P
Ludzi tam w pierona, musiołech jechać ścieżkom, ale na szczyńści - była równo. 
Potym sie zaczył podjazd, tyż pierońsko długi. I w zasadzie 2 niydobre sprawy w tym samym prawie czasie. Coś mi przi pyndalowaniu zaczyło szczylać, normalnie odgłoś czegoś pynkajoncego itp. suport? szprychy tyż trza bydzie obadać :/ chyba w końcu byda musioł po 16kkm odwiydzić syrwis... i drugo sprawa - zaczyło mie od środka na zgiynciu boleć kolano, jakiś miynsiyń. Zaś to samo. Ostatnio robiłech czasówka, potym 500km, wszyndzi normalnie jeżdża, niy bolało i myślołech, że już all ok. Pyndalować szło, ale ból se dowoł we znaki..




Spokojnie sie jakoś turlołech. W drodze na Nysa pomagoł wiatr, na lajcie sie jechało nawet 30km/h. Tympyraturka na liczniku 35-37' heh..
Ale już na Prudnik czyńściowo bardzij jazda pod wiatr. 
Kajś w tyj porze zaczyło mie zmulać i to nawet fest. ALE miołech kupione 3 kawy nescafe 3w1 :P Jedna wymiyszołech i po poru minutach zaś był tryb "noł-zamulajzing" :D


A od strony połednia było widać...


Zaś mi sie Bukownia-Tour wspomnioł. To samo.
Jechołech z nadziejom, że przejdzie bokiym abo co. Kolano dalij bolało. W kole dalij coś strzylało.



Drogi były mokrawe, gałynzie pozrywane, ale na mie jeszcze żodno kropla niy spadła. Zauważyłech, że chmury idom na wschód jakoś.

Sam już na DK40. Dłuższy wariant, ale droga w bombon stanie! Niy chciołech zaś wracać bez te zadupia wcześnij wspomniane.


Na skrziżowaniu DK40 z DK45 ostatni zakpy. Wypiłech jeszcze kawa mojo. I sie zaczła jazda cyntralnie pod wiatr! ojj.. 


Na prostyj zaś kole 18km/h. Z górki może 25. Chciołech owe 500km zrobić w 24h, ale warunki niy pozwolały... Po prostu pyndalowołech na lajcie, bez spiny.
W Raciborzu krótko pauza. Dzwoniłech do Pawła - padoł, że spierdzieloł przed deszczym :D Dzwoniłech du dom, że byda kaj za 1,5h.
Zjodłech jeszcze pół szekolady iii... zaczyło mi sie robić z jij powodu fest ale to fest niydobrze :/ Gipko popiłech wodom i dodatkowo zażyłech "neutralizator" w postaci gumy do żucio. Jakbych zwlekoł jeszcze pora sekund, to na bank bych zaczył rzigać. Powoli zaczynało przechodzić. Ale miołech zawroty, rynce zaczyły dryntwieć. Ledwo co stołech, w zasadzie leżołech na tym moim kole. Tak fatalnie z powodu jedzynio jeszcze sie nigdy niy czułech... Ludzie przechodzili, nikt niy zareagowoł. Dopiyro jakiś kierowca podjechoł i spytoł, co mie sie dzieje. Piyrwszy roz realnie mogłech zakończyć swój trip w karetce abo w szpitalu. Skuli gupij szekolady...
Minyło dobre 15min, aż mi sie polepszyło tak, że mogłech kontynuować jazda. Jakoś se turlołech na spokojnie. Dojechołech do Rybnika, 485km zrobione. Czułech se okej. W miara okej. Ale tym razym niy odpuściłech i postanowiłech dokryncić do tych pieprzonych 500km! Rundka na cyntrum i nazot. 0:20 byłech już w doma. Czas brutto 25h 20min. średnio najgorszo chyba w karierze, ale kolano, silny wiatr i przede wszystkim przewyższynia zrobiły swoje. Musza prziznać - niy spodziewołech se, że 3 saszetki kawy sprawiom, że mie sie w ogóle niy bydzie chciało spać. W ogóle niy czułech zmynczynio przi 40h bez snu heh.

+13 gmin. Kłodzki "półwysep" w końcu w CV :P
Pokaż trasę GPS

Przijechołech [z roboty]. Pojodłech. Spakowołech. Wyruszyłech [w rajza]. 

Ksiynga Gustava, rozdział czworty, werset szesnosty.

Dzisio z pyndalowanio nici. Rano jeszcze świyciło słońce, ale już od połednia dyszcz, dyszcz i dyszcz. No ale w końcu miołech okazjo zrobić generalne porzondki w swojij izbie :D no i tyż pobawić sie z Repack'iym :> 

Dostołech niyjedno pozytywno recynzjo na tymat tyj taszy i jom zamówiłech. Chodziło mi o tako tasza, do kieryj zapakuja podstawowe pierdoły na wiynkszo rajza z kilkoma noclygami. Tyn Repack mi sie fest spodoboł, bo mo fest gipki montaż, fest wielki załadunek (co ważne - tasza dostosowuje sie do tego załadunku) i fest mało woga. W sklepach był standard: bagażnik na sztyca i do tego tasza (już niy pamiyntom, czy była tako pojemno, jak jo by chioł). Wariant sztywniejszy, ale i ciynżejszy. Cynowo to samo.

Podstawowe pierdoły, jaki bych załadowoł, widać na foto: laczki-dżaponki, adidasy, 2 pary spodynek, 2 t-shirty, hantuch, narzyndzia jakiś w razie hycynio pany, jakiś żel, szczotka, pasta, fuzekle, batki, kurtka (niy ma na foto).

No to ładujymy te lonty! © gustav


Trocha tego placu sam je © gustav


I załadowane © gustav


Tak to wyglondo © gustav


I trocha z bliska © gustav

Wszystko sie zmieściło na knap, ale jakbych to upchnył tak fest, to jeszcze by coś wlazło, czyli jednym słowym - tasza spełnio moji oczekiwania!

Trocha jednak wiyncyj, jak jednym :P

Do pukieltaszy takij na koło moga wciepać pozostało drobnica i moga pyndalować, kaj dusza zapragnie :))

jutro zaś wolne, jakieś małopolskie gminy? :P

Czyli nastympne zaś przemierzani małopolskich gmin w celu ich zdobycio, rzecz jasno :P Jak żeh niydowno zrobił trasa do Bukowiny, tak doszło do mie, że zdobyci całego tego województwa, a przinajmij z 80-90% jego gmin w tym roku jest fest możliwe do wykonanio. Bo okolice Gorlic to już bydzie total hardkor, myśla rajza pod 600km, z czego 2/3 w górach...

No to jako że trefiły mi se 2 dni wolnego, no to cele trza realizować. Piyrw miołech pyndalowć do Krynicy Zdrój, ale że prognozowali jakiś małe burze, to wolołech se w góry niy zapyndzać, yno bardzi na północ. Z roboty prziszłech po 22-ij, przigotowania koła, drzymka (...) 2h, śniadanko i o 3:20 wyjazd. Oj bydzie zamulać w drugij nocy.

Przigotowania trasy.



W nocy jazda na lajcie, jakiś 19-20'.

Sam już w okolicach Mysłowic.


I remont DK94.. Czasym musiołech brać na koło (:D) auta za mnom, bo pachołki były na środku i zero szans na wyprzedzanie mie. Ale momyntami było gryfne pobocze :>

I potym jazda do miejscowości np. Klucze



Czasym przez taki zadupia ehh.. ale czego se niy robi dlo nowych gmin




Coś mi w pewnym momyncie kidło na szłapa :D pierzińskie ftoki..


Ogólnie cały czas pyndalowało se fajnie :) Tympyraturka ponad 30', ale przi lajtowym tympie niy aż tak odczuwalno. Chocioż trocha mie spolyło.



Piyrwszo przeprawa wodno w Opatowcu. Koszt 2,5zł.



I sam widziecie, jak se prezentuje mojo nowo torba pod zic Bikepack Repack X2 w wersji Large. Załadowano w jakiś 50-60%.

Szkoda, że to niy te Gorzyce 15km od Rybnika.. Jeszcze przejyżdżołech dzisio przez Pawłowice, Wodzisław i coś tam znanego ze Ślonska jeszcze. A ogólnie te wzory w tym polu fest podejrzane, co na to ufologi?? 


I to już gmina przigraniczno z Podkarpackim, do kieryj musiołech odbić 7km w jedna strona :P


Już w tych okolicach niebo było miejscami troszka cymniejsze.. i trocha tyż bardzij wioło..


Drugo przeprawa w Nowym Korczynie za już 1zł.


Ooo ciymnij coroz bardzij na północy.. W drodze do Busko-Zdroja.


Dojechołech do Pińczowa przed 21-om. Tam ostatni zakupy, kupiłech całe pieczywo, co mieli - 3 kołoczki, krepel i rogal. Ciekawe na wiela km styknie... Miołech jeszcze 3 banany. I już było widać efekty dzisiejszyj pogody..


Jak sie już ściymniło, to zaczyło powoli padać. Jeśli chodzi o kryzysy, to jeszcze niy miołech, pyndalowało mi sie fajnie. Jeszcze...
No nic - oblykłech zapakowano kurtka i ochraniacze na szczewiki - kiere dodatkowo od góry obkleiłech taśmom. I tak kropiło aż do Szczekocin, czyli było jeszcze okej. Kajś przi drodze jeszcze napotkołech otworty sklyp - kupiłech 3 7dejsy. Ale pora km dalij juz zaczylo bardzij padać - niy rychtyk ulywa, ale normalny dyszcz. Przestoło z 15-20km przed Tarnowskimi Górami. Powiym tak - kurtka sie spisała, ale ochraniacze - tragedia! De facto wody od zewnontrz niy przepuszczały, ale brak cyrkulacji powietrza spowodowoł wiadomo co :/ Niy miołech basyniu w tych szczewikach, ale wszystko w środku mokre, wilgotne.. Musza jakiś patynt na to wymyślić - abo po prostu nastympny roz wyciepać wkładki, seblyc fuzekle i obejrzeć rezultat. Abo kiery z Was czytajoncych mo jaki patynt?

To mie wyniszczyło. Ochota do pyndalowanio spodała z kożdym kilometrym.

Kożdym.

Dodatkowo pojawiył sie kryzys spanio; zwidy i fatamorgany na średnim poziomie, ale zaś była jazda na krawyndzi wypadku (czytej: jazda środkowym/lewym pasym). Miołech tabletki BE-power z biedronki - coś tam pomogały troszka. Tympyraturka tyj nocy jakiś 17'.

Przijechołech du dom o 5:50, czyli czas brutto 26h 30min. Jest to najgorszo śrenio na tego typu dystansie w moim CV. Dobrze, że mało o dzwio pauz miołech. Niy byłech tyż o dziwo specjalnie głodny, nogi tyż niy bolały, ale wilgoć w szczewikach zrobiła swoje - wyplompała mie na amyn. Jak ległech do wyra, to choby zabity. Obudzili mie po 9h spanio z pytaniym, czy jo żyja.

Tera coś, co mie dołuje tyż fest - z Dąbrowy Tarnowskiej jechołech direkt do Bolesławia, bo do Mędrzechowa była droga w budowie. Myślołech, że jak te miejscowości som od siebie 2km, to to je ta samo gmina. Myliłech sie. Tera mom pojednynczo, bioło plama na mapce i zaś tam byda musioł ciulać jeszcze roz... Mogłech w sumie zaznaczyć i mieć spokój "aaa yno 2km, ale mom wszystko wokół nij objechane to może być". Oszukiwani w taki sposób to oszukwani yno samego siebie!

Małopolsko - zaro cie mom!
Trzecie 500km w tym roku, niyźle.
+24 gminy
Pokaż trasę GPS

Po fest słabym poczontki tego miesionca udało mi se przebić zaś 2000km :))