Ogródki na rynku. W zasadzie aż ku bazylice powstowo coroz wiyncyj takich oto ławeczek, stoliczków, paryzoli... Ludzie przeca muszom kajś chloć procyntowe trunki hehe

Pozwola se yebnyć sam tako ciekawo dlo mie statystyka, tj. bez piyrwsze cztyry miesionce tegoż że roku, na kole zrobiłech 6200km. A z kolei autym jako kierowca - 221km, z czego 68km we własnym interesie, reszta jako szofer dlo kogokolwiek :D Jak pożyczom auto, to głównie jeżdża nim kajś w ciulato pogoda, a najczyńścij to do biedronki po ultra-zakupy (:D) czyli 8-10 banioków wody po 5 litrów :P Na koło za pierona tego niy zapakuja, nawet ta prziczepa z BalticTour by miała problym hehe. W zeszłym roku autym zrobiłech niy wiyncyj jak 1000km, ale w tym roku rozpisuja se to już co do kilometra, żeby mieć rychtyk dokładne porównani :> Czyli 68 vs 6200 - jak niy widać różnicy, to po co przepłacać heheheheh

Z rana nawet słonecznie i niycałe 20st; a w drodze powrotnyj zachodni huragan i 8st... ale miołech pica, że już niy padało heh.
No i zapisołech se tera na ślonski maraton w Mszanie, co bydzie w czyrwcu - na tym mtb spróbuja machnyć 500/24.

Trocha hopek na tych 10km mom (a raczyj na 5-6) :) wg gpsies: 103m.

Z roboty, na podjeździe © gustav


Z roboty, na zjeździe © gustav

zasypiom..

Zamiast muzy ;]


Realizacja planu trwo w nojlepsze.. Nastympny kroczek do gryfnego, zielonego monolitu odhaczony :) To była jedna z tych RAJZ, na kiero czekołech, a niy tak jak ostatno tydziyń tymu - kiero chciołech mieć już za sobom. Multum szwarnych fotek, super pogoda i widoczki, zaś jakiś rekordy, a z negatywów to yno tragicznie mizerno końcówka... no ale żyja eheh...

No to tak: prziszłech z roboty przed 19. Od razu w kole wymieniłech kieta ze stock'owego kmc na hg40. Bawia se w zamiany, a niy, że na jednyj kiecie jeżdża, aż cały napynd rozdupi ;] Potym jeszcze dlo pewności obejrzołech pogoda - w nocy już okej, w końcu niy ma mrozów, a za dnia hyc i zero opadów. no i wiater W, WS umiarkowany (no chyba niy...). Do biedrony po pieczywo na trasa + kawy 3w1, kiere kiedyś zdoły egzamin. Potym ograniołech mapa, co przi gminobraniu trwo trocha długo. Wszystki przigotowania dużo czasu zajyły, beztoż wyjechołech o 23:25. Darowołech se spani, bo tydziyń tymu żałowołech, że wyjechołech w zasadzie wczesno nad ranym. Czyli kolejno próba super dystansu po robocie, ale już na mtb :) Żeby dojechać najkrócyj do Prudnika, musiołech jechać bez te wszystki zadupia za Raciborzym...

Sztyjc wioski, na foto Lisięcice © gustav

Bez żodnyj złośliwości, że godom na to zadupia, ale fest niy lubia sam jeździć, bo sam po prostu nic niy ma. Dodatkowo droga cało ta mo status wojewódzkij (!) a jak wyglondo, widać na foto...  Po za obszarami zabudowanymi miołech rychtyk ciarki, normalnie strach pyndalować jak se mo świadomość, że jedne auto jechało co nawet godzina. Od Raciborza aż do DK40, bez prawie 50km naliczyłech 6 aut. Z czego 3 aż w 1 wiosce.. Ale całe szczyńści, że w nocy już som niy byda mioł powodu tu jechać kiedyś.
I potym gryfnym asfaltym już bez Prudnik aż do Nysy, kaj wbiłech na tanksztela po butla wody. Było 6-7 stopni i ogólnie super se jechało. Teoretyczny wiater z zachodu w ogóle niy odczuwalny! Kupiłech ta woda za 3,5 ale jak obsługa se dowiedziała, co jo odwalom na tym kole... :D zaro w gratisie hotdog, gorko herbatka, 11 odblasków, żeby było mie bardzij widać i szolka od coca coli hehehe miołech być sam yno góra 3min, a zeszło ze 40min :>


Gratisowy tank na tankszteli :) © gustav

No to w Nysie mom już jakiś fanów hehe

Słit focia? łaj not :D © gustav


Fol odblasków i szolka © gustav

Padołech, że jak nastympny roz sam pojada, to z tom prziczepkom z BalticTour, co by te wszystki gratisowe fanty pomieścić :D


Wschód nastowo © gustav


Droga na Kłodzko © gustav


Poranne mgły © gustav


KaPiTaLniE © gustav


Zameczek w okolicach Kamieńca © gustav

Była już jakoś 7:30-8, wiync powoli se ciepło robiło, trza było seblyc wszystki grzejonce lonty, z wyj. komina, kominiarki i bluzy. Widać na foto, że wciepołech jedyn inkszy koszyk na bidon - w takim moga wozić już butle 1,5-1,75l, co znacznie redukuje robiynie przerw na zakupy.

Postój na tle gór © gustav

Piyrwszo gmina Bardo na 160km hehe. Mniyjwiyncyj od tego czasu "uruchomił" se tyn wiater, wioł raczyj z WS. Momyntami fajnie zawiywoł ehh... Czyli udało mi se zrobić te 140-150km w prawie bezwietrznych warunkach. Dobry biznes ta jazda zaro po robocie.

Wbijomy na gryfny asfalt © gustav


Taki wiodczki :) © gustav

Do Srebrnyj Góry pod lekki nachylynie, cołki czos pod wiater, ok 18km/h na spokojnie :)

Srebrna Góra © gustav

Na tyj ścince już musiołech seblyc mojo kominiarka, bluza, bo hajcung totalny.. Zaczył se lans w pełnych narodowych barwach - strój BS to je to!

Srebrna Góra w cyntrum © gustav


I widok z podjazdu - KOSMOS! © gustav


Już na zjeździe © gustav


Serpentynki mmm © gustav

Yno 3km musiołech podjechać, a raczyj zjechać w dół, do Nowyj Rudy, czyli po gmina :>

Zjazd po jedna gmina © gustav

I potym jeszcze do sklypu po wyngle i na podjazd, niby 722m :)

Podjazd do Dzierżoniowa © gustav

W tymże mieście spotykom młodego adepta kolarstwa z klubu LKS ATOM, kiery prowadzi mie aż do Piławy Górnej.


Ściyżki w Dzierżoniowie © gustav

W tle najwyższy szczyt pod Wrocławiym - Sobótka/Góra Ślęża 718m. Praktycznie z kożdego miejsca widoczno :)

Ciepłowody - okolice © gustav


Przeszło 30 stopni © gustav

Do Łagiewnik pod doś mocny wiater.. średnio 20km/h na tym odcinku. I zaś w tle Sobótka.

DK39 do Łagiewnik © gustav

Zjazd z DK8 po 2 gminy, to ta najdalszo od chaty :>

Najdalszo dzisiejszo gmina © gustav

I potym prosto DW do Oławy z jednym postojym w sklepie. Wiatr nawet mi pomogoł, czynsto na liczniku ze 30km/h :> Dopiyro w Brzegu wbijom do biedrony po ostatni już zakupy na noc.


W zasadzie pusto DK94 © gustav


Taki se z tyłu © gustav


Jest moc, niy ma co! © gustav


Kajś na wiadukcie © gustav


Taki inksze hehe © gustav

Potym już niy było czego fotografować. Tradycyjnie fotka zachodu bych zrobił, ale wszyndzi chmury. Na wyjeździe z Opola średnio 24.17 jeszcze pamiyntom i jakoś 420km. Moji morale były jeszcze bardzo dobre :) Na przistanku oblykłech już nocne wdzianka, coś pojodłech i jazda na ostatnio prawie setka. Z tym że już direkt w zasadzie pod som wiatr. Ale że słońce zaszło, to i tyn wiatr już niy był taki mocny, jak za dnia. Powoli zaczynała se ochota na spani... W zasadzie już niy społech 37-38h. Roz yno miołech 20min taki synny kryzysik na DK8 po połedniu. A droga na Racibórz fest mi se dłużyła, masakrycznie fest... W zasadzie średnio pyndalowołech 20km/h. Ochota na jedzynie - średnio. Ogólnie na DK 45 im bliżyj Raciborza, tym wiyncyj hopek. W pewnym momyncie zostało 40km. Pyndaluja i pyndaluja - 37. Po jakimś czasie - 34. No jo piernicza tako jazda.. Ale najgorsze było to, że co chwila musiołech stować, żeby se jebnyć porzondie w morda i w ogóle - tak mi se spać chciało... Jo już mioł myśli legnyć se na jakoś trowa i na 2h pospać. Było 13 stopni, wiync w miara ciepło. Ale niy - po to mom bransoletka NEVER GIVE UP! od Ultrakolarza, żeby w takich momyntach dokończyć zaplanowana rajza!! Jakoś se kulołech. Ale im bliżyj Racioborza, tym mojo termika organizmu zaczyła szwankować, abo pieorn wiy co. Na zjazdach było mi zima, na podjazdach niy umiołech strzimać z ciepła. Oblykłech polarowe rynkawiczki, to za ciepło, oblykłech letni kolarski - za zima... :/ To samo jeśli chodzi o obleczyni bluzy abo czopki... Miołech już totalnie wyebane na średnio, i tak była dalij rekordowo. Jechołech w trybie eko. Noo a już 5km przed Rybnikiym zaliczyłech zol... nie wiym czy zasnyłech, straciłech koncentracjo, zapatrzyłech se w coś... wjechołech w krawynżnik od chodnika i ciuuul z kołym na ziymia.. :( przi nadgarstku i na udzie skóra zedrzyto, dziwne, że spodynki całe...
Przijechołech pobudzony bez tyn "wypadek" jakoś o 2:10-2:20, czyli 27h zeszło - to o 3h mniyj niż tydziyń tymu na tym samym dystansie. Jak lygłech do wyra, to po 2min w innym świecie.

Pobiłech rekord dystansu "po robocie" o prawie 16km. Uzyskołech najlepszo średnio na 500km na tego typu kole (a spokojnie idzie odejmnyć czas na te wszystki przerwy bezsynsowne, nawet ze 2-3min na kożdo setka opcjonalnie). Dublet weekendowy po 500km :)

Myśla, że na tegorocznym maratonie już w Mszanie (do zeszłego roku w Radlinie) - mom szansa uzyskać na tym kole 500km w 24h. To by było coś :)

+22 gminy i 7-ka z przodu :) Kurde, nad Wrocławiym brakuje mi jednyj jedynyj gminy, żeby tyn "West Wall" rychtyk równo wyglondoł. Rok tymu miołbych ta gmina, gdyby do nij prowadził asfalt, a niy kamienisto ściyżka bez pole... Ale po nia podjada kiedyś, jak byda we Wrocławiu jeszcze roz :)

Pokaż trasę GPS

Szwagier se kupił gryfne koło na miasto, pyndalowani nim: francja-elegancja :)) wideo pod lekkim kontym, bo kamerka umieszczono w najbardzij prosty sposób na kasku; musza wiync nastympny roz zastosować przejściówki, żeby wypoziomować :)

..noo i zrobiłech te wideo - wyjazd z Rybnika do Żor o zachodzie słońca. Cały plik mo 2gb, wiync ładowanie direkt na YT trwo ponad godzina, beztoż spasuja. Próbuja skonwertować w jakimś programie - zmiyjszyć wielkość - tyż to trwo wieki.. kurde je problym :/ Jakiś sugestie? Jakim programym proponujecie i na jakich ustawiyniach, żeby wideo specjalnie se niy pogorszyło? żeby chocioż na 500-700mb zyjść :>


Wyczekiwani na odpowiedni momynt © gustav


Nad jeziorkiym © gustav


Nad torami © gustav

Jedne słowo opisujonce ta rajza - masakra! Jij cołki przebiyg ciynżko bydzie zapomnieć, a i tyż monyj bez to, że je to piyrwsze pół kafla na kole inkszym, niż szosa :) Dobre, wiync sprawa mo se tak: cholernie hardkorowy cyl na tyn rok, czyli super zielony monolit ze zdobytymi gminami w promiyniu >150km od Rybnika (+cało Małopolska). Tak w skrócie - ok. 10 zaplanowanych rajz o długości 500-550km... Jak podziwocie se na mojo mapka gmin, to idzie zauważyć dużo biołych sektorów, kiere po zazielyniyniu stworzom upragniony monolit - Od Kudowy Zdrój, bez Wrocław, Łódź, Kielce, aż po Gorlice :> Kożdo sobota z dobrymi warunkami trza bydzie poświyncić. Niystety, ta sobota była co najwyżyj dostateczno...

Prziszłech w piontek z roboty po 18-yj i zaroz oblukołech prognozy - zachód okej, cyntrum przejściowe lekki opady i czasym słońce, tympuraturka do 10st. Ale coś o sile wiatru niy dosłyszołech... Yno, że je zimny, arktyczny. Decyzjo: jada! Cołki przigotowania dużo czasu zajyły, bo musiołech mapa ogarnyć, koło przigotować, do biedrony po chlyb iś.. ;D Poszłech "spać" o północy i budzik na 2:00. W sumie społech godzina, bo usnyć niy szło...


Gminobranie.pl © gustav


Chlyb na trasa © gustav

Wyjechołech o 3:30, bo zaś miołech dylemat, co se mom oblyc. Wylozłech na dwór i jakoś specjalnie zima niy było. Brać ta bluza? A monyj inksze galoty? A letni rynkawiczki? Kajś mi se stracił mój tzw. komin na szyja i czopka, wiync wziyłech 2 koszulki w ich miejsce i zrobiłech chusty. W Rybniku jakoś w miara ciepło mi se zdoło. Kole 4st. Ale już po za cyntrum coroz zimnij.. W Gliwicach na światłach wyprzedził mie typ na mtb. 1-2st. a tyn w spodynkach i w bluzie... Trocha zapierniczoł hehe no ale łydy mioł dowalone, pewno sportowiec. Ale jechoł mojim śladym, wiync go gonia. Utrzimuja odległość 20m i wkur**om typa mym prox'ym :D Lampka po prostu ogiyń! Jakoś hopka se zbliżo i gość zauważalnie słabnie. Dziwnie se musioł czuć, że mie, takigo niypozornego, obładowanego "turysty", wyprzedził, a teraz niy umi odjechać hehe. W końcu na jakimś skrziżowaniu zjechoł.

Tu już tympyraturka -0,5st... Kole 50km i zauważalnie zaczło wioć z północy...

Za Gliwicami © gustav

Jakoś 8 rano i ok. 80km.

Seblykani se, bo hyc powoli se robi © gustav

Wbiłech jeszcze do pobliskigo sklepu po woda i 2 kreple :> Jedyn gościu pytoł se kaj jada itp. jak padołech, że 500 robia, to wiadomo, jako jego reakcja była :D Życzył dobryj "rajzy" :)

Już na tyj DK kajś na poboczu stoł gościu przi aucie; padoł, że mie w Oleśnie wyprzedzoł. No i tyż "szerokij drogi". Miło :)

DK11 bombon! © gustav

Kole 10-yj..

Iście momy wiosna © gustav

W tymże mieście nasmarowołech kieta finiszlajnym :>

Kluczborskie ściyżki © gustav

Kurde, dziwnie wyruszać w tako rajza bez lemondki. Byłech yno ciekaw, na kierym km'ie bydzie hard w komforcie.

Od Wołczyna zaczyło se gminobranie, po 155km jeszcze pamiyntom :> Wioło dalij fest. Pogoda ciulato - zima, słońca tela co nic, momyntami kropiło... średnio w tym momencie prawie 22. Już miołech myśli, żeby se wycofać z tyj rajzy, póki jeszcze moji morale były na dobrym poziomie. No ale jednak zaryzykowołech - szczerze to ta 500-ka to je jedna z tych, co chciołbych mieć już za sobom, beztoż drugi roz sam przijyżdżać to by było po prostu tragedia.


Anti-storm patynt © gustav

Dopiyro po połedniu tympuratura podskoczyła do 10-11st, wiync wtedy mogłech se pozwolić na seblyczynie np. galot przeciwdeszczowych, ochraniaczy na szczewiki, czy wymiany zimowych rynkawiczek na polarowe wiosynne...

Sam było 215km, momyntami bołech se tych chmur.. :/ Jedna rzecz musza jeszcze kupić - rynkawiczki na dyszcz.

Jedna z gmin © gustav

Mało sam co szczegółowo pisać, bo jeździłech po samych zadupiach i krajobrazy wszyndzi taki same.. Niymniyj jednak był to teryn ciut pagórkowaty. Bo na północ Wrocławia je dużo hopek. Pamiyntom, bo tam gminy zbiyrołech :D


Wiatraki przed Sulmierzycami © gustav

Słońce piyrwszy roz wylazło na ciut dłużyj, niż chwileczka :)

Sulmierzyce © gustav

Od tyj miejscowości jeszcze kilka km'ów na północ i po 260km jakoś potym trasa z wiatrym w końcu do Ostrowa. W zasadzie wioło tak 60% z N i 40% z W. Po drodze już powoli zaopatrywołech se w prowiant na noc. Wbiłech do sklypu i wykupiłech wszystki słodki pieczywa: 3 kołoczki, 2 kreple, tako dupno wielkości obiadowego talyrza zista, coś jeszcze hmm? ;] Padołech sprzedawczyni, że jada z Rybnika do Ostrowa właśnie i nazot, tako wycieczka. Babka se pyto:
- to gdzie tu masz nocleg?
- no ale jo ta trasa [500km] jada bez spanio.. :D

Tradycyjnie prawie zawału dostała, tak to już je z tymi ludziami hehehe

Piyrwszy, nocny tank © gustav

Wbiłech jesczcze do lidla po... 13 żymł, tych za 65gr :D No kurfa tyn zestaw już musi mi na noc styknyć :D

Przi tym znaku już "przepakowołech se" tzn, oblykłech wszystko, co miołech + mp3. Najgorsze było to, że tyn wiater już niy wioł tak mocno gynał, jak jechołech w jego kierunku :/ Ledwo go odczuwołech. A może mi se tak zdowało?

Ostrzeszów... never more © gustav

I potym na Mikstat, Grabów, Bolesławiec po ostatni już gminy. Bocznymi dróżkami rzecz jasno, w ciymnościach. Drogi istny tor przeszkód. Dookoła same lasy, czasym jakiś pola, jedne auto jechało co 10min, a jo uzależniony yno od mojij przednij lampki... Ale dała rada. Najlepsze było to, że na średnim trybie jak mie niykiere auta mijały, to świyciły długimi. Wiync jak widziołech kolejne auta, to dołech słaby tryb. I tyż zaś długimi walili... lol. Żeby tyn prox mioł tako moc? o.0

Wyjechołech w końcu na DK w Kluczborku. Było hmm 1-2 w nocy. W zasadzie od samego Grabowa mie muliło już... Wszak bez ostatnie 1,5 doby społech 1h ehhh. Ale już w drodze na Olesno było fest źle. Pojawiały se zwidy, fatamorgany itp.
-ciynżko było utrzimać koncentracjo, bo cały czas oczy se zamykały. Jada przi bocznyj linii, zamykom i otwiyrom oczy, a jo już na przeciwnym pasie... cołki czos jazda slalomym.. niejedyn roz to ze 30-50m auto, czy nawet tir były przedy mnom... jazda na krawyndzi człowego zderzynio...
-patrza se do zadku i widza, że jakiś auto do mie se zbliżo. Patrza zaś w kierunku jazdy i po 5s zaś do zadku, a tego auta już niy ma... a droga bez skrziżowania..
-z daleka widziołech jakoś osoba, a z bliska to było cokolwiek, yno niy człowiek
-różne inksze przekształcynia widocznych elmeyntów

Wbiłech na piyrwszo napotkano tanksztela. Zaro po kawa. Takie gówno 250ml za 5,5zł ale co zrobić, ważne że ciepłe i że moge pomóc. Chciołech zjeść wiynkszośc mojigo jedzyno, żeby co chwila niy robić przerw na uzupełniynie. Po zjedzyniu kołoczka i pół już miołech doś.. I maksymalnie mie zmulało. Jo już tam w zasadzie społ, ale musiołech se pilnować. Stykło na 20s zamknyć oczy i odleciołbych do krainy snów. Na dworze już było zero stopni. Jedzyni (w zasadzie pora ostatnich żymł i ta zista) zimne, w bidonach jeszcze jako-tako, bo trzimołech je w kapsach ze zadku koszulki. Ale jeszcze do kibla i ku lustrze poprawić, a raczyj ulepszyć ochrona przed zimnym. Te koszulki + oderwano kapuca z kurtki dowały rada, chocioż mój sprawdzony już zestaw komina+czopki był znacznie lepszy. Z Olesna du dom 110km i praktycznie same hopki. Kawa jakoś niy bardzo pomogła, musiołbych jeszcze ze 3 taki wypić. Tympuratura spodła do -2, jak już niebo se rozjaśniało powoli...

Wschód po roz drugi © gustav


To teraz - przed Gliwicami © gustav

Zjodłech jeszcze ostatni żymły, a tyj zisty ani niy ruszołech. Zimne były i popijołech je zimnom wodom. Super. Miołech nadzieja, że te ostatni 50-60km przejada bez dziwanio se już na jakikolwiek jedzynie. W Gliwicach już o 8-yj zaś, robiło se ciepło. Niebo prawie czyste,a wiater już zachodni badzij. Zaś seblykłech pół zestawu lontów. Ogólnie tego typu pogoda mie fest denerwuje. Np. mosz obleczone jakiś dodatkowe galotki, to z nimi je ciepło, a jak je sebleczesz, to z tymi podstawowymi galotkami już je zima. I niy wiysz co je lepsze..
Od granicy Gliwic wyprzedzo mie jakis gościu na bardzo podobnym kole, co moji. Pyndaluje do Rybnika na jakiś maraton biegowy. Z samego Bytomia, szacun! Godo mi, żebych wloz na koło :D Kurde jo mioł relaksacyjnie dojechać du dom, a tu naroz mom jeszcze szłapy dowalać? :D Ale dobra, "zaryzykowołech" hehe. Dojechalimy do Rybca, na miejsce tego maratonu, bo miołech po drodze w miara. I już mie chytoł głód. Pożegnołech se z kamratym i du dom. Ostatni 5km total relaxx, na super lekkim przełożyniu, bo same hopki. Głód wyniszczoł, niy ma co. Wróciłech zaro po 9:30, czyli jakoś 30h zeszło eheh...

Myślołech, że bydzie znacznie gorzyj zy mnom po tyj trasie. Pamiyntom październikowo rajza do Łodzi, tyż prawie 500km w identycznych warunkach, to wtedy przijechołech wyplompany na maxa, i to jeszcze jechołech na szosie. No i tak pobiłech kilka rekordów:
- piyrwsze 500km na kole typu mtb
- najwcześniejsze kalyndarzowo 500km (rok tymu zrobiłech tela pod koniec kwiytnia)
- 500km w najniższym zakresie tympyratur (od -2 do 11)
- 260km pod wiatr (z czego ok. 210km pod rychtyk dołujoncy wiatr)
- symboliczno razja nr 10 w kat. >500km :)


Nowy rekord na MTB! © gustav

Dało rada przeżyć bez lemondki. Czas netto podołech taki, jak na liczniku. Jakby odejmnyć wszystki postoje, kaj licznik dalij naliczo czas po zatrzimaniu, to z 10min lekko by szło odejmnyć. Mój zic giant connect spisoł se, mimo, że super miynkkie niy ma :>

Po powrocie społech od 11 do 18. Som żeh se obudził i niy szło dalij już spać. A teoretycznie powinienech spać z 15h po takij trasie :> Zrobiłech relacja i zaś trza iś spać heh bo powoli zmulo. Tak to już je w tym "sporcie" :)

+19 nowych gmin
Trasa przez 5 województw :)

Pokaż trasę GPS