2482km do pyndzyje, czyli 7/8 planu kilometrowego wykonane w prawie 5/6 roku hyhy

Rundka do azot i nazot ;D Żory cyntrum noo ;p Mojo dotychczasowo kominiarka se kajś straciła... beztoż musiołech kupić nowo, bo zima idzie ;> Ale tera znacznie lepszo jest, bo wiynkszo, bardzij se rozciongo i zakrywo cały kark. Wczorej było o godz. 22-ij 4,5st. a dzisio o tyj samyj godz. 9,5st. Tako kominiarka, mimo że jeszcze niy ma mrozów - w rybnickich zanieczyszczyniach bardzo pomogo... Tak jak u chińskich obywateli ehehe...



Anti-smog patynt © gustav


Żorskie serpentyny ;] © gustav

-coś ty ognisko rozpoloł, że te lonty ci tak śmierdzom?
-niy, po Rybniku pyndalowołech...

Jest moc z tych kominów, niy ma co. Rundka wieczorym po mieście. Przed wyjazdym wyngle, wiadomo. Zjodłech około 8 porcji i jeszcze niyjedno porcja bych zjod...

No jak tym pojeść...? © gustav


Elektrownia © gustav


Bieżnia, młoty itd © gustav


Fontanna światełka © gustav


I inkszo fontanna, na Placu Wolności © gustav


Oczko w parku tematycznym © gustav


I coś a'la most © gustav


Jakoś wystawa © gustav


Power of prox © gustav

A do pyndzyje już yno 2533km ;]

Yno jeszcze 2591km do pyndzyje, czyli 67dni bezmała.

Ostatnio rajza w tym roku na tego typu dystansie - chyba, że bydzie jeszcze jak 24 grudnia zeszłego roku, 11st. w nocy... Bo tera to był nastympny hardkor brrr... Som bych tego niy jechoł za pierona! Ale że xtnt zaproponowoł, a im pryndzyj nabija kilometry, tym pryndzyj przejda na pyndzyjo - no to rajza ~300km to je ważny % przeca ;]

Od razu jego relacja: klikej sam!

Wiync tak. Prziszłech se z roboty po 13, czynności szykujonce, odpoczywajonce, wynglo-uzupełniajonce, jakiś tam jeszcze i przed 18 byłech już prawie fertig do wyjazdu, bo na 20 spotkanie w Kędierzynie. Prawie... Bo tam kaj zawsze miołech kominiarka - tam jij nie było. A to je podstawowy elemynt ubioru na rajzy z tymp. poniżyj 10st. Mojij zimowyj czopki tyż niy znalozłech... Aha - zapomniołech w robocie... No i kuźwa już po 18, a jo mom problym. No nic - wracom do Arctic Storm z poczontku tego roku i zamiast czopki i kominarki biera chusta i t-shirta. Efekt bydzie na fotkach. Wyjazd 18:25, czyli już wiym, że musza mieć średnio ponad 30, żeby być punkt 20 w Kędzierzynie. Jedzie mi se okej, ale już po 15km w Rudach tymp. spado do 5,2st.! A to dopiyro godzina 19... a o 16yj po placu żeh se chodził w krótkim rynkowku i spodynkach lol. Beztoż oblykom se już polarowe rynkawiczki. Po 10km tymp. wzrasto do 7st. Na miejscu spotkanio jeżeh 20:06 i Tomek xtnt już se czeko. Wbijomy na Kaufland celym zrobiynio zakupów jedzynio no nocne kryncynie. W synsie jo wbijom hehe.

Kauflandowe zakupy © gustav

4 kołoczki, ultra-żymła, 3 banany, oshee, woda, herbatniki... W miyndzyczasie spacerowanio po sklepie słysza rozmowa pracowniczek:
"Jeszcze godzina i spier**lam wkońcu na chatę" :D :D

Żeby znalyźc kasy, musiołech obyjść połowa sklepu - kto robi zakupy w tym sklepie, to wiy..
Przichodza na kasa, babka se mie pyto, czamu niy zwożyłech bananów... - "bo w biedronce niy trzeba" :D
Uff, w końcu opuszczom tynże labirynt. I od razu oblykom se na noc we wszystko co mom. Pod tym sklepym zeszło dobre 40min hehe.

No to oblykom se! © gustav


Niebo wyczyszczone © gustav

Jak se idzie domyśleć - zero chmur w październiku przepowiado mroźno aura... Tu na jednym z postojów.

Mie akurat było zima © gustav

U góry mom aż 5 warstw! termo-bluza, t-shirt, bluza a'la zimowo, kolarsko, no i jeszcze ciyniutko kurtka przeciwdyszczowo od Tomka. No bo mu ciepło je i jij rzekomo niy potrzebuje... Wiync mom okazjo tako przetestować se zaś.
Zamiast kominiarki: chusta + t-shirt ;> Cało noc tak jechołech. A Tomek? Yno jakoś czopeczka, a kark, gymba odkryto całkowicie! I jeszcze bezczelnie godo, że mu zima niy ma... Jak żyć, no jak??

I w pewnym momyncie, na równiutkim asfalcie towarzysz złapoł guma... W takij tymp. to je niy za fajnie...

Najniższo tympyraturka tyj nocy © gustav

Ze 20min zleciało, ale jak se czyto relacje tych, co se pyndalujom przi -20st. no to my preca niy mogymy narzekać ;]
Wpadlimy na gryfno idea.. :>

Pol te ognicho, bo zima ;D © gustav

...ale długo to niy trwo, bo drewna my niy zneleźli :/ W synsie suchego drewna hyhy.

Ale kilometr dalij widzymy dupne ognisko! Noo fatamorgana to niy ma. Wiync wbijomy na party hehe. Był to Szkot, lekko podpity ;D Po co on polył ognisko o 2:30 w nocy? Niy wiym. Ważne, że szło se ogrzoć i to fest! :> Podpolić se tam nic niy miało prawa - jakiś pojedyncze drzewa były z 7-10m dalij i ogólnie mokrawe. A on polył jakiś naszykowane deski.

Scottish [after]vodka © gustav

Dojyżdżomy do Nysy na znano tanksztela, ale na darmowe hotdogi i herbata niy ma co liczyć ;] Jymy jedzonko, zimnawe już ehh. A nastympnie na cyntrum. Ogólnie nic ciekawego, pusto.

Nysa wiadukt © gustav


Kibel w tym bannerze? ;D © gustav


Parkomat np © gustav

I od razu DW do Krapkowic. W tym mieście tymp. wbijo może do 6-7st. ale na wyjeździe i dalij zaś spado.

Żodnymu niy godać o tych koksach © gustav

Noc mimo wszystko szło przeżyć... Mie fest muliło jakoś, ale se śpiywołech, coby niy usnyć (;D) no i Tomek tyż doł mi kapsuła anty-sleeping hehe. I potym już było okej, rześko! W Krapkowicach kolejny dłuższy postój na tankszteli.


Odra wschód © gustav


A4 we mgiełkach © gustav


X tyż se foci © gustav


W drodze na Annaberg © gustav


Pomidor hyhyh haha © gustav

T-shirt na łepie w pełnyj okazałości

Na poważnie lepij jednak © gustav

Przed podjazdym na Anaberg słońce ładnie świyciło, beztoż trza se było seblyc połowa lontów ;] Coś mi se zdo, że bez tyj kurtki byłoby... źle. Spokojnym tympym 5 warstw to było optimum, a i na postojach bez tragedii :)


Panorama na wiyrchu ;] © gustav


Swiynty Tunel © gustav


Już na zjeździe © gustav


X testuje pewno kamera © gustav


Jesiyń na zjeździe © gustav


Jesiyń w okazałości © gustav

I ta se potym lajtowym tympym do Pyskowic, kaj szukomy miejscówki na obiod abo cokolwiek ciepłego - niystety nic z tych rzeczy. W biedronce był napad na bankomat i sklep zawrzyty... Wiync nazot na cyntrum do tesco, po ostatni uzupełniyni wyngli ;] Tu se żegnomy i kożdy w swojo strona. Jakoś ok. 11yj i tyż mniyjwiyncyj stopni.. Dziynki Tomek za mobilizacja i kolejno hardkorowo rajza! :) Szkoda, że żodyn wiyncyj niy chcioł jechać, a pisołech kilkunastu człowiekom :I

Nazot to już agresywnym tympym, żeby se dogrzoć hehe. No i po Rybniku dokryncanie do symbolicznego 300. Mom wiyncyj rajz 300-499, niż 200-299 hehe to mie cieszy :))

W doma 14:25, czyli równe 20h brutto. Jest to normalnie anty-rekord na 300km :D Moji piyrwsze 300km było w czasie jakoś 18h hehehe. Ale czas w tyj rajzie nie był przeca najważniejszy, i to jeszcze w takim mrozie :) Był fun i to se liczy.

Pokaż trasę GPS

Zostało 2893km do pyndzyje - czyli bezmała 69 dniuf. A potym se kupia patyki do nordik łokink i se byda chodził normalnie po wsi.

Piyrw po odbiór fona z reklamacje - wkomponowali nowy aparat/obiektyw, bo jest folia ochronno ;]
Potym do decathlonu po bidon i zajembisto bluza 40% tańszo hyhy.
Nastympnie po baterie.
Na koniec do lidla... Pytani konkursowe dlo odwiedzajoncych tyn że wpis: co to je te biołe? ;p

Kultularny posiłek na przistanku © gustav

A tu foto nowych rogów - z 80zł zaoszczyndziłech ;> A prawie jak nowe. No i tyż w końcu mimo wszystko jednakże ostatecznie... skróciłech kiera o 9cm i jest lepij :) z 70 na 61.

9cm mniyj + nowe rogi © gustav

Taki coś wybudowali direkt obok Castoramy... Somsiedzi eeehhh

Nowe marketooo! © gustav

Ogólnie jak na koniec października prawie - ciepło :)

Zostało 2911km do pyndzyje i yno 72dni.
Motywuja se niczym nasz Top1 hehe ;)) Dzisio runda na Gliwice, kurde tam pod wiatr, nazot w połowie w lekkim deszczyku.. I tak mie szłapy bolały, tak nie było mocy, a przed wyjazdym same wyngle ładowołech do basa hmm nie ogarniom. Nagrywołech filmik - kamerka na sztycy i obrócono do zadku - na dniach zmontuja.

Pozostało 2973km do emerytury. Czyli 73 dni kurde.

Wczorej rodzinno dżampreza, na kieryj przityłech prawie 3kg (zjodłech spokojnie tyle, co na dwudniowyj rajzie na kole xD), a dzisio rano po odespaniu było już 2kg mynij ;D Trza se było wiync rozruszać jakoś yyyyhhh Rundka na Godów, niebo prawie wyczyszczone no i w słońcu jakoś 20st. :)

Wytargołech rogi na kiera w bdb stanie za 20zeta, kiedy to nówki sztuki som po ok. 100zł... ;] jutro jakiś foto bydzie.

...a tak ogólnie 5st. i przejrzystość luftu momyntami ograniczono, ale niy przez mgła... ;>

Rundka po wsi po powrocie. Fast wypucowany, wyregulowany, nasmarowany - zaro se lepij jeździ, ale yno w teorii. Bo praktycznie w dzisiejszyj aurze jest ciulato pierońsko... Mocny wiatr z północy, 6-7st., noc w zasadzie już o 18yj, normalne depresyjnie. Nawet z wiatrym z górki niy chciało mi se gipcij pyndalować... 1. foto - na wyremontowanyj od niydowna ul. Sportowej w Niewiadomiu. 2. foto - totalne pustki na ścieżkach. Foty takie, na jakie aktualnie pozwalo mi mój telefon "zapasowy", bo xperia od wczorej w reklamacji. A cyfrówki niy miołech kaj schować.