Zaproponowołech na ta niedziela z rana runda w Beskidy, głównie klasyk przez Salmopol. Chętni byli, o dziwo. Pobudka 6:40 i tankowanie wyngli. Za oknym szaro, ponuro, ale bez opadów. Chocioż drogi były mokre. Przed wyjściym sms, że dwóch se wycofało... bo u nich dyszczym kropi. Dojyżdżom na ustalone miejsce 8:03 i pusto. Czekom z 10min., niy ma nikogo, no to jada som... Kierunek Pszczyna >> B-B. Tympyraturka 8st.



W Żorach już zaczyno kropić... Ale dzielnie jada, jeszcze optymistycznie, bo kropi słabo. Niy mniyj - w Pszczynie już mom prawie mokre skarpety, wiync wbijom do sklepu po worki, a przi okazji kupuja 2 banany i 2 wafle. Worki oczywiście jako ochraniacz.


Niystety, owe worki tym razym średnio działają. W B-B na piyrwszym przistanku pauza, chodzenie, podskoki, coby dogrzoć stopy. Mom w torbie z narzędziami 2 skarpety stare jako szmatki - no to oblykom jako dodatkowo "warstwa" - może pomoże. Dalij padze, dalij poniżyj 8st. Tu 2 fotki z B-B :>



Stopy se dogrzoły, ale jo decyduja se zrezygnować z jazdy na Salmopol. Mogłoby se to źle skończyć. Musza już rychtyk pomyśleć nad czymś w rodzaju dexshell'ów. Bo jedzie se fajnie, ale zimno od dołu niszczy cało frajda, trzeba walczyć o przetrwanie :/ Kieruja se na Strumień. Tu na foto już wiślanka i idiotyczny projekt ścieżki rowerowyj. Od początku do końca ok. 500m. Za tymi domami nic niy ma. Yno pola. Tera se wyobraźcie, że w lato idzie tu familio z małymi bajtlami, nie wiym - rolki, hulajnogi, rowerki, a ty chcesz po tyj ścieżce jechać 40km/h... Co zrobisz? Cało wiślanka od Ustronia do Katowic w 95% mo pobocze, jak na tym foto. Zakaz jest tu - w Zbytkowie i w Łaziskach Górnych na nieco ponad kilometrze - tam tyż je pobocze... Idealny przikład na to, że na szczeblach projektowania infrastruktury momy ludzi z defektym wyobraźni.


Myślołech, że projektanci w końcu poszli po rozum i wymyślili tako oto ścieżka obok wiślanki. Niystety - to nowy węzeł na Cieszyn.


I słów kilka nt. nowego zica - piyrwszy test i jeżeh bardzo zadowolony :) Zarówno w normalnym chwycie jak i na lemondce - jedzie se komfortowo! I fest mi se podobo ta okrągło końcówka wydechu; ponoć cały 'exhaust system' był projektowany w Maranello.



I jeszcze doładowanie w Żorach ;)


Na całyj trasie kilku lokalnych rowerzystów jadących "do sklepu" i jedyn pasjonat na trekkingu. Wyjść ze strefy komfortu - it's not easy ;) A jo zaś mom +1pkt. do doświadczynio w jeździe w takij pogodzie. Ida spać zaro ehe..