Ogólnie mom zol i ledwo kontaktuja :P Beztoż fest krótki opis zapoznawczy, kiery jutro prawidłowo z-edytuja :> Hardkorowy maraton, rekordowo średnio na 500km [i to na MTB!!] i ogólnie pogoda niyzbyt... tzn. ledwo co 10st. i konkretny dyszcz na poczontku i pod koniec. Jak jutro przijada do roboty i niy dostana upomniynio za pogorszone właściwości mojigo chodzynio, to bydzie fajnie. Dostołech puchar[ek] i 5szt. torebek herbaty... Niy wygrołech nic w loterii (a tak chciołech szosa marki Romet za 1800zł..;]).

EDIT:

W robocie przeżyłech jakoś, ogólnie żyja, oddychom, nawet już mom smaka na jedzyni (eheh...), wiync wypadałoby sam co naszkryflać.

Tak wiync VI Ślonski Maraton "domowy" - w zasadzie jedyno przewidziano impreza w mojij dziedzinie na tyn rok :) Z powodu braku szosy, trza było jechać tym, co miołech, czyli Talonym. Jakbych mioł szosa - wybrołbych 600km, bo 500 to już niy ma wyzwanie na tego typu trasie. Ale że mom do dyspozycji 14kg mtb [niyzaładowane] - to 500km było do mie jednak wyzwaniym :)

Przijechołech 2km do Pawła pod blok i jechalimy wyjontkowo autym te 14km na start. Jak wyjyżdżołech z doma - ulywa. Ale po 500m przestoło... A u Pawła pod blokiym sucho!

No to jadymy w piekło! © gustav

Ogólnie wielkij fotorelacji niy bydzie, bo masa fociszy idzie znalyź we internecie, abo na srejsbuku na grupie z tegoż maratonu hehe.

Ciekawe, co ludzie se myśleli... ;]

Jedyne MTB na 500+km © gustav

20min przed startym jeszcze gipko do lewiatana po jedzyni, bo na tych nudlach co w doma pojodłech, to daleko bych niy ujechoł. I gynał zza ściany wylazła reporterka z radia w celu przeprowadzynio wywiadu hehe

4. Play: https://www.radio90.pl/po-raz-pierwszy-wyruszyli-z...


Start krejzoli © gustav

No i co - jo startowołech w 3. grupie o 15:10. Zaczynało ciut ciut kropić...

Trasa: http://www.gokir-mszana.pl/sokol/2015/trasa.html

1. pyntla:

Start o dziwo zbyt spokojny, jak na szosowo ekipa, yno jedyn gościu od razu uciykł. Jo w zasadzie do punktu kontrolnego na 62.km w Raciborzu, byłech na pozycjach 2-4. Ale jakoś mie to niy dziwiło - jak sie mo jakoś forma, to 500/24 na szosie i jeszcze na takij łatwyj trasie to niy ma wyczyn... wiync se jechali bez szarpanio. Już na wjeździe do Czech zaczło loć! I z kożdym metrym coroz mocnij... Jeszcze do tego tympyratura 13 st. i momy fajno impreza... bryle miołech zaparowane, w szczewikach basyn, ale niy było czasu, żeby se oblyc przeciwdyszczowe ubrania... A że tympo było godne, to jakoś tego zimna niy odczuwołech heh.. Deszcz przestoł padać w okolicach Gorzyc, na wjeździe na DK78. Dopiyro hardokr se zaczył na wyjeździe z raciborskigo punktu. 2min czekołech, aż se miejsce w kiblu zwolni i jak wlozłech już na koło i wjechołech na trasa, to cały peleton 300m przedy mnom... Ile sił w szłapach jechołech i dogoniłech ufff :D No ale to były typki na 300km... W cyntrum miasta dopiyro chycilimy mojo grupa. I co se wtedy dzioło???? Gustav na MTB na przodzie peletonu, a za nim dobre 15 typków na SZOSACH... i prowadziłech aż do wylotu z tego Raciborza, średnio lekko 35... Fest niyzrozumiałe dlo mie to było, czamu ŻODYN niy wyjechoł przedy mie... trasy niy znali? Zaczła se piyrwszo kiympka, stykło nawet 5% i już mie wszyscy wyprzedzali. 8kg szosy vs 16kg mtb, czyli 2x wiynkszo masa całego zestawu, 2x ciynższo masa rotujonco, 2x szersze opony... niy było grama szans... Do końca pyntli jechołech w towarzystwie gościa, kiery niy mioł parcia na bicie rekordów. Owo pyntla zrobiono w czasie netto 3:05, brutto 3:15. Rekord na 100km na mtb. Szłapy zgorane! Na końcu tyj pyntli [to był tyż start] to był jedyny yno bufet z jedzyniym. W Raciborzu podowali yno coś do picia. Zjodłech żymły do maksimum, ze 4 wziyłech na trasa i jazda. Aha - chciołech se fuzekle przemiynić na zapasowe, suche. Kajś mi wypadła abo co, jedna... Kurdeee! Gość z punktu żywieniowego zauważył mojo tragiczno sytuacja, to użyczył mi swoich. Napchołech jeszcze do szczewików sznuptychle abo inakszy - taszyntuchy (2 wersje chusteczek po naszymu hehe), bo wkładki jeszcze niy wyschły i pewno gipko mi by zaś zoki (inno wersja skarpet :P) se "namoczyły".

2. pyntla:

Wyjechołech na nia całkowicie som. Szłapy bolały, a najbardzij łydki hehe. Już jechołech swoim tympym, musiołech dychnyć i zregenerować se. Ale tympo było dobre. Na direk wyjeździe z punktu w Raciborzu wyruszom przed dwoma bbt-ourowcami. Dogonili mie dopiyro po 20km na wiynkszyj hopce. Abo jo zapierdzieloł, abo oni se jechali na lajcie.. :> Ale na zjeździe kajś tam ich dogoniłech hehe. A 3km przed końcym pyntli uciykłech im. Średnio na liczniku 30. Teraz serwowali na punkcie żurek i chlyb. Do pełna zatankowołech ;> Na trasa zaś ze 3 żymły. No i oblykłech se już nakolanniki, ochrona na kark, kominiarka na łeb, bo było 10-11st... ale jeszcze bez kurtki. I tyn gościu, co mi pożyczył swoi fuzekle, to znaloz ta moja jedno zagubiono ;D

3. pyntla:

Wyjechołech w towarzystwie gościa, co jechoł na 400km. Tympo mioł dobre; na prostych odcinkach to raczyj czyńścij to jo jechoł za nim, wiadomo WHY... A jo całkowicie był już zregenerowany po tyj 1. pyntli! Kurde kożdy podjazd na lajcie, nic mie niy bolało! I już se pojawiały piyrwsze myśli - jak dalij byda mioł taki tympo, to może atak na 600??!! Od Raciborza już jechołech som aż do końca pyntli. Zaś żurek do oporu z chlybym :P Uwaga - na tyj pyntli na trasie zjodłech yno jedna żymła! ogiyyyń :)) Ale wziyłech jeszcze ze 2 żymły na zapas, w sumie 4. A do picia to na punktach kafyj, tyj i najważniejsze - WYNGLE BEZ LIMITU :D :D jo sypoł po jakoś 100g do kożdego bidona haha a co se byda, coś za te wpisowe trza mieć niy? :> Średnio 29 z ułamkiym

4. pyntla:

Ponownie som. Drogi mokrawe, musiało zaś padać. Tympyratura dalij w okolicach 10st. A jo dalij bez kurtki, yno koszulka termo + kolarsko. Bo cały czas jechołech w miara gipko = niy było mi nic a nic zima. Bo dalij z nadziejom, że te 600 jest realne. Kurde, jo tu piyrw z planym, że jak zrobia 500 w 23h 59min, to bydzie fest zajembiście, a tu już mi 600 chodzi po łepie... niynormalne. Ale nic mi [jeszcze] niy dolegało, byłech zmotywowany pierońsko!!! warunki pogodowe [jeszcze] prawie że idealne na bicie rekordów, brak o dziwo mocniejszego wiatru... Nooo i na mniejwiyncyj 350.km zaczyły mie już zauważalnie boleć szłapy, a konkretnie 4-głowe... Jaaa gustav, no to mosz po rekordzie chyba :D Mimo to punkt w Raciborzu gipko załatwiony i dalij walczyłech. Ale zaczły se końcowe hopki i zaś coroz gorzyj.. ale mimo to 3 szosowców wyprzedziłech 0.o Dojechołech na punkt, a tam już Janekbike i Funio - obaj zrezygnowali z dalszyj jazdy. Jedyn problym z kolanym, drugi z 50km objazdym po Czechach... I już info, że nadchodzi dyszcz... Jo po tych 400km mioł aktualny czas jazdy brutto 15,5h! Średnio netto 28,8. Czyli jeszcze była teoretyczno nadzieja na 6 z przodu... ALE: miołech głód, godzina 6:40, była najwiynkszo wilgoć o tyj porze, 9-10st. A czynnik decydujoncy: robiło mi se niydobrze na widok jedzynio. Wziyłech mało porcja nudli, a i tak całego niy zjodłech... niy umiołech. I niy pojodłech se. Wiedziołech, że za 30km bydzie odcinka. Beztoż wziyłech na trasa max ile wlazło do zadnich kaps z koszulki: 3 żymły i 2 kreple.

5. pyntla:

Piyrwsze 2 podjazdy i decyzja: to je mojo ostatnio pyntla. Już czułech głód powoli, dopiyro po czeskij stronie zjodłech 2szt. "zapasu" z 5. Szłapy już dowalone na amyn. Przed Chałupkami zaczło zaś mocno loć. Wbiłech na przistanek i oblykłech cały przeciwdyszczowy arsynał. Włoncznie z dwoma warstwami worków na śmieci w szczewikach. Jechało se mimo to fajnie w tym dyszczu, ale jednak zmynczyni robiło swoje. Dokulołech se do Raciborza na głodzie.. i tam aż 40min pauzy. 10min. jodłech jedna mało żymła!!! normalnie niy umiołech se na to dziwać. Już mie organizatory grzecznie "wypraszali" :D w synsie - im dłużyj byda siedzioł, tym gorzyj dlo mie. Ale miołech jeszcze ponad 4h na zrobiynie 38km, także lajcik xDD I tako pogoda ciulato - roz słońce, roz deszczym nadupcało i tak na zmiana aż do końca. Na ostatnich 20km dopiyro czułech przemoczyni w szczewikach. Mijali mie wszyscy - niedzielni rowerzyści, 10-letni synek na pół-rozwalonym kole i cało reszta ekipy z maratonu... jo mioł morale na poziomie -800. Dojechołech na meta, ta pytla zrobiono w czasie lekko 5,5h, średnio spadła o 1,5km/h, czas brutto niycałe 22h. I tak dobrze. Potym zaro zaproszynie na bigos, pepsi... Niy miołech jako wrócić, cały mokry, a do rozdanio nagród 3h... trocha podzwoniłech po znajomych w celu transportu, ale brak rezultatu, beztoż... wróciłech du dom na kole... co zrobisz? nic niy zrobisz... 16km po hopkach, w 44min... depresja itd itp. W doma se ogarnyłech, 30min drzymki i na rozdanie z Pawłym autym. Ledwo co kontaktowołech.. Tragedia.

Ciekawe, czy jaki dyplom i foto prziślom hmm... Rok tymu cało ''pula'' była od razu. No i rok tymu wszystkigo było wiyncyj, a 20zł tanij heh; 3 punkty żywnościowe na 150km vs 1 punkt na 100km. I znacznie wiyncyj przewyższyń niż tera. I nawet pucharek był wiynkszy hyhyhy Ale co jak co - 4 pyntle i wiyncyj to już je za dużo. Może jakbych jechoł na szosie, to by było lepij ''na psychice''.


Nooo se mom puchar © gustav


Drugi pucharek do kolekcje :) © gustav