Kolejno seria gminobrania i jednocześnie jedna z dwóch najbardzij hardkorowych, jeśli chodzi o plan zielonego, gminnego monolitu :) Hardkorowo, a w zasadzie w stylu "welcome to hell" - bo rajza po roz piyrwszy poprowadzono wszerz całyj Małopolski! - czyli w zasadzie same hopki (czasym ścianki, a czasym płaskie proste). No a drugo, jeszcze bardzij piekielno rajza po gminy to bydzie do Krynicy, a tam to już niy som w zasadzie hopki, a rychtyk góry... No dobra, tyn weekend padło na Gorlice. Miołech jechać już tam tydziyń tymu z kamratym Pawłym, ale coś pogoda niy była za pewno i prziszłech z roboty ledwo żywy :/ Tera pogoda już była piykno! Obiecołech Pawłowi, że pojadymy do tych Gorlic kiedy indzij, ale mijajoncy tydziyń był tak zawalony jak nigdy, że nawet niy miołech czasu ogarnyć inkszyj rajzy po gminy, np Kalisz czy Łódź.. Bo opisywanie wszystkich miejscowości, rysowanie śladu i zapamiyntywanie w google streetview ważnych punktów trwo lekko 2h. A Gorlice miołech już ogarnyte z zeszłego tydnia, wiync niy było wyjścia. Paweł - pojadymy jeszcze roz :)

Tak wiync w piontek prziszłech z roboty po 18-yj i niy byłech specjalnie wyplompany - co było fest istotne. Biedronka, szykowani koła, inksze pierdoły, jedzynie i wyruszyłech dopiyro o 22:45. Jako, że do Gorlic wg mapy było jakiś 250km, to wyjazd o północy to było maksimum. Wiadomo, zdobywać gminy w nocy to je problym. Noc zapowiadali bezchmurno i kole 2-3 stopni. Jeszcze idzie strzimać.

Brzeszcze-Wadowice:


Krynciło se wybornie, a jak tympyraturka spadła poniżyj 6 stopni, to dopiyro oblykłech ochraniacze na szczewiki. Za Kalwarią miołech skryncić w mały skrót na Myślenice, ale skrynciłech chyba z 10km pryndzyj... bo poczontek tego skrótu wyglondoł identycznie, jak planowany na streetview i to mie zmyliło ehh skrziżowanie ze strumyczkiym, ciulato nawierzchnia, wonskie podjazdy... No nic, jechołech. I wjechołech na super hopka!


I chyba niy żałuja tego objazdu, bo widoki KAPITALNE!!! A normalnie to bych jechoł kajś z 150-200m niżyj i nici z widoków. Ogólnie tyn part jak i wiynkszość z tyj rajzy mom uwiecznione na kamerce, ale wideo dopiyro zmontuja na dniach, tak wiync cierpliwości :)

Potym super zjazd i wyjechołech kurde nie wiym... Mapa samochodowo + gps i wtedy dopiyro se kapłech, że jada objazdym :D 10km gratis heh...

Ale mimo pewnych trudności, dokulołech se na wojewódzko, kiero prowadziła do DK7.




Bajka bajka bajka bajka x1000 !!!!!!!!!!!!!!!!!!!!!!!!!!!!!!!!!!!!!


Zarozki po zjeździe z DK7 pojawiyło se Jezioro Dobczyckie, kaj seblykłech połowa lontów, bo już hajcung powoli se robił. Widoki takie, że se szło zesrać normalnie! A najlepsze było dopiyro przedy mnom :P


No i zarozki po małym striptizie zaczyła se super hopka :) I po nij co chwila zjazdy i podjazdy. A i tyż pojawiyły se momyntami proste odcinki. Mniejwiyncyj w okolicach Gdowa. Akurat wtedy trocha moji morale se podnosły, bo myślołech, że prostych w tych okolicach to nic niy bydzie hehe.





Ogólnie dzisio wiyncyj fotek, jak opisu :P Bo jednak na tych zdjynciach wszystko widać co i jak :)) A jak jeszcze dojdzie film, to klynkejcie narody :D







Jakbych jechoł do Gorlic bez cało DK28, to właśnie równolegle bych pyndalowoł w tych że góreczkach heheh...


...ale to mie bydzie czekać w czasie rajzy do wspomnianyj Krynicy. Bo ta rajza miała tyż na celu przetestowanie alternatywnego śladu na wschód Małopolski :)

A oto Dunajec :))


Piyrwszy znak, kaj ukozały se Gorlice. Tu tyż nasmarowołech kieta, bo coś sucho w napyndzie powoli było ;]

Zakryntasy :>


I uwaga - jedyn z najgryfniejszych partów tyjże rajzy!! Sekwyncja 10%, 9% i 9% na odcinku hmm góra 2km Coś piyknego, widoki z wiyrchu ooooooo...










Piyrwszo zdobyto gmina, na liczniku równe 240km... :D


I po poru km'ach z naprzeciwka wyjechoł górski Tytan, WujekG! I jazda w kierunku gorlickigo rynku i potym po kolejne gminy :) Fotek chyba właduja rekordowo ilość, bo je na co se dziwać :))







Jedna z pauz w sklepie. Wojtek to jest kolejny Gość, kiery praktycznie nic niy spożywo w trakcie krycynio, np w niydownym tripie na 400km na Węgry, zjod (o ile dobrze zapamiyntołech): 5 batoników, 1 sznita (kanapka), może coś tam jeszcze drobnostkowego... To jo mom jednak problym... Bo co zjodłech na tyj rajzie, to naszkryflom na koniec :P










No i wciepna tera fotki Wojtka, co mi przesłoł :) Trocha tego je... :>













Piyrwszo symboliczno gmina z Podkarpacia! W końcu!
















W końcu jakiś fotki gustava w akcji hehe bo rzadko mom fotografa w rajzie :)) Na wszystkich podjazdach Wojtek mi odjyżdżoł, co je normalne :D On + koło - 80kg; jo + [załadowane] koło - prawie 100kg! :D Ale niy ma wymówek hehe. I w gminie Szerzyny wbilimy do sklepu. Kupiłech se rożka i woda. Wojtek po chwili jechoł w swojo strona. Dziynki wielkie za towarzystwo! Jo wbił po jeszcze 2 rożki. Jedyn tyn som, a drugi jakiś inkszy. Dołech 5zł, a babka wydała mi 10gr.. no kurfa ile ten drugi rożek kosztowoł, jak tyn piyrwszy był za 95gr??? Ale za choya już niy szło zwrócić nazot... Bo tyn rożek jakiś firmowy, zagraniczny...

Ruszyłech schłodzony i wnerwiony zleksza dalij heh..

Kaj niy zajada, tam Jaworzno... :D


Na ściance ponad 10% na Zalasową (prawie bych na nij wydupił.. :D)  spotkołech rowerzysty, z kierym jechołech aż do Tuchowa. Spoko luźne kryncynie itd. Pozdrawiom go, po pewno bydzie czytoł (dołech linka na bloga hehe). W Tuchowie wbilimy do sklepu i se my pożegnali. Jo jeszcze jechoł zadupiami po ostatnio gmina Pleśna.






I na tym skrziżowaniu odpolyłech gpsa, celym zobaczynio, ile du dom km'ów...


Miało być 530km a wychodziło lekko 570... ojojoj... Wszystko by było cacy, gdyby niy direkt zachodni wiater... :/ Ale jak zachodziło słońce, to wiater trocha osłob, a w nocy już praktycznie niy odczuwalny. W drodze na Bochnia dużo prostych o dziwo. Ale już na Kraków sztyjc góra-dół-góra-dół...


Powiym tak: miynśnie okej. W kolanach było czuć. Ale fest wkurw**ła mie termika. W bluzie za ciepło, bez - chłodnawo. Rynkawiczki zwykłe - chłodnawo, polarowe - za ciepło. Co chwila przerwy ma dostosowywanie. I jeszcze niy miołech ochoty jejść już tych prawie suchych żymł, kołoczków... Ale najgorsze dopiyro było przedy mnom. Przed Oświęcimiem zaczyło padać... Galoty na dyszcz miołech, ochraniacze tyż, ale kurtki brak. Wlozłech na przistanek i czekołech z 20min co dalij. Jeszcze to był tyn momynt, jak mie fest zamulało z niydospania ehh. Wpychołech te ostatni resztki jedzynio, kawa w bidonie zmiyszołech ale po 2 łykach wylołech - fuuuuj! i po chwili przestoło padać, wiync bez namysłu jechołech dalij. I już niy padało wiyncyj. Dziynkowołech Niebiosom, bo jakby loło godzina, dwie, to jo je pokonany. A była kaj 3 w nocy. I tyż powoli zachodni wiater se uruchamioł. Z kożdom godzinom corozki mocniejszy. Cały czas kulołech se aż du dom ze średniom hmm kole 16-17km/h. TRAGEDIA! mimo, że cały czas tympyratura niy spadała poniżyj 10 stopni, to mi było jakoś zima. Przed Żorami zaś przejściowo lekko padało, ale yno pora minut. W drodze do Żor pora razy tyż zasnyłech na lynsztandze (3-5s), jechołech slalomym (roz to nawet walnyłbych w wyprzedzajonce mie auto...).


Dopiyro w drodze do Rybnika coś se polepszyło. Relacja oczywiście na filmiku jest. Doczołgołech se du dom o 8:00, niewiele pojodłech, jak usnyłech o 9:00, to stanyłlech po 19-yj. Po 2godz. zas mie zmuliło i społech do 7-yj rano. Taki żywot w tym świecie heh. Ale rajza udano jak najbardzij :) z wyjontkiym ostatnich 100km.

Zjodłech: chlyb 500g, 8 rogalików, 6-7 bananów, 3 rożki, 8-10 (niy pamiyntom) kołoczków, 5 żymł, 2 prince pola xxl, yyy coś zapomniołech? + wody zwykłe i smakowe :) 

+14 nowych gmin
- rekord dystansu na mtb pobity o 51km
- czas brutto 33h 20min
- czas bez spanio 50h...
- >500km po roz trzeci po robocie
- >500km po roz trzeci w ostatnich 30 dniach

Film jak napisołech - zrobia na dniach i tu zamieszcza, wiync wypatrywać sam co jakiś czas :)


Nowy rekord na MTB! © gustav