Rajza testowo z Pawłym na tegorocznyj pyntli na naszym domowym maratonie :) No i tyż test koła na wiynkszyj trasie. W sklepie mi padali, że do 2 tydni abo po 200km moga prziść na serwis gwarancyjny, w zasadzie jutro już bych mógł :D

Wyjazd o 6 rano, ale było już z 10 stopni :) Trza było dojechać 18km do Mszany na start pyntli. A do zeszłego roku impreza była w Radlinie, kaj miołech 3km yno. Pyndalowało se spoko, nawet mi Paweł niy uciekoł na swojij szosie, ale chyba preferowoł jazda optymalnym tympym ;] Kulo se te koło niyźle, nawet idzie fajnie prziśpieszać :)


Jakiś tam z wiyrchu © gustav

Musza jednak wyciepać te odblaski  :> Psujom dizajn, mimo, że niybieski i pomarańcz idealnie do sia pasujom heh

Jakiś tam z boku © gustav

A samo deska rozdzielczo - bombon! Z poczontku se wydowała za szeroko, ale już żeh se przizwyczaił i niy mom zamiaru ucinać. Różnica 14cm wzglyndym poprzednij. Mógbych sam jeszcze wkomponować bez problymu lemondka :>

70cm placu na duperele :] © gustav


Przisypało aż z Egiptu :D © gustav


Zwiydzomy Sahara © gustav


Wioseczka tam kajś © gustav


Taki bardzij 3D hehe © gustav

Już niydaleko Raciborza uaktywnił se fest silny wiater z NW. Na prostyj pod wiatr ledwo 25km/h (nawet mi bryle wypadły bez te turbulyncje..), na podjeździe z wiatrym 35... W Raciborzu po jakoś 80km do Biedrony po wyngle - 2 mini-bagietki, kołoczyk i krepel, no i woda smakowo.
Trocha my pogodali o robocie Pawła, jak to montowoł monitoring u gościa u kierego straszyło ponoć. Że na wideo było widać, jak coś tam ot tak samoistnie se przewraco... po chwili moji koło se przewróciło. Tyż ot tak samoistnie... No kufa mać:D


BiedronkaOIL © gustav

Wiater niby w plecy, ale i tak przeszkadzoł... Se zdowało że wioł z kożdyj strony. Dojechalimy do mety i jaki wnioski? tegoroczno pyntla to je nic w porównaniu z tom, co była rok tymu. Fest mało konkretnych podjazdów i dużo w miara płaskich odcinków. Rok tymu było w zasadzie odwrotnie.

120km zrobione, a że Paweł chcioł min. 150, no to jechalimy jeszcze do Żor i potym na rybnickie hopki, a na koniec w miejsce, kaj woniało, jak w jakimś cyntrum odnowy biologicznyj :> Ogólnie do Żor jechalimy w miara dobrym tympym, a od Żor już spokojnym, bo i tyż było pod tyn pieroński wiater.


Jastrzębie obwodnica © gustav


I konsek dalij © gustav


Na wiyrchu na niby 11% © gustav


Tężnia solankowa w Radlinie © gustav