Obejrzołech se wczora pogoda i dzisio tak do połednia, abo ciut dłużyj - mo jeszcze niy padać. No i tyż jak na wiosna przistało - już bez mrozów za dnia. Musiołech se wyżyć wiync na jakijś wiynkszyj rajzie! Wstołech o 3:30, po 3h spanio... Ryż i te sprawy; apropo ryżu: skoro jo wdupił 1 worek i tak 2/3 drugigo worka, to abo zy mnom je coś niy tak, abo ta instrukcjo je jakoś z kosmosu wziynto... 1 worek dlo 2 ludzi??? 0.o



Oblykłech se na styczniowo, poranno aura i wyjechołech. I po 1km nazot! Normalnie hyc pieroński! Jo se jeszcze niy rozgrzoł, a już żeh se musioł rozpinać powoli :> Rynkawiczki zimowe zamieniłech na zwykłe polarowe. Kurtka w ogóle wyciepołech, tak samo jak ochraniacze na szczewiki i galoty dresowe. Miołech nakolanniki + galotki taki do lotanio, 1 pora fuzekli grubszych, koszulka termo + kolarsko, czopka i kominiarka, no i tzw. komin + asekuracyjnie bluza na kark hehe Taki zestaw to mom przeważnie rychtyk na wiosna już, jak je z 10*C... 5:45 ostateczny wyjazd :P I jak se okozało - bombon zestawiynie! Ani za zima ani za ciepło :) 

Pora wschodów, bo normalnie coś piyknego!






Tako tympyraturka o!


Annaberg, opolski rodzynek:


Do Opola dojechołech w 3,5h netto, średnio 28 z groszami. Wiater taki średni, z zachodu mniyjwiyncyj. Póki co: 2 bidony wyngli + banan. Kupiłech w piekarni JEDNEGO kołoczka i JEDNA żymła za 3zł 10gr... Żeh to od razu zjod, ale jeszcze w inkszym sklepie dokupiłech woda i 3 kołoczki, a raczyj kołoczyczki.. ;> Ogólnie tego sklepu spożywczego doś trocha szukołech, kajś w okolicach cyntrum, a jeszcze zamiast asfaltu to kostka... i średnio mi spadła o jakiś 0,8km/h :( I tak jak przijechołech DK45, tak nazot postanowiłech wracać równolegle DW423.







Droga wylotowo - porażka. Piyrwsze 30km od Opola - asfalt bajka o dziwo. A potym dalij urok dróg wojewódzkich, sztyjc jakiś połatane dziury, koleiny itp. Ale kurde tak mi se gryfnie pyndalowało, że niy wiym! :D Bo ogólnie wiater mi niy przeszkadzoł ani trocha, a tyż ta DW w porównaniu do DK45 była znacznie bardzij płasko. Mało kiedy mi licznik pokazywoł mynij jak 30km/h. 

Krótko pauza na jedzyni :P Piyrwszo pauza.




Drugo pauza to miołech w Kędzierzynie na światłach, a trzecio w Rudach w sklepie (aż mi żol było se zatrzimywać, bo tak se spektakularnie krynciło, no ale tankować trza) ;> Kupiłech woda smakowo i 3 banany. 180km, średnio rekordowo, a jo dalij naładowany jak nigdy! Skond ta moc, tymbardzij, że niyspecjalnie dużo jodłech (jak na mie hehe). Czworto pauza zaś na światłach heheheh. Ostatni 10km to już pora wzniesiyń, ale walczyłech! Ani głodny, wyngli pod dostatkiym (juz miołech myśli se oblywać, bo tak mi hyc było! 8*C eheh..), ale w miynśniach było czuć już. Dowiozłech znakomito średnio (godz. 13:30, czyli ani 8h!), kiero je nowym rekordym solo na tymże dystansie. W doma ani mi se jejść obiodu niy chciało i w zasadzie mógłbych kryncić dalij (spokojniejszym tympym wiadomo :)) Wniosek - je postymp! Optymistycznie se tyn rok zaczyno :) 



Musza se zacznyć bawić jeszcze dzisio w poprawki mojigo bloga, póki co dalij wersjo stock'owo :)