W końcu zrobiłech setka, uwaga! bez grama jedzynio na cołkim odcinku :> I to jeszcze w grudniowyj tympuraturce, kaj zapotrzebowani na jedzonko je niby wiynksze (mom recht?). Po zjedzyniu śniodanio kole 11, miołech zarozki wyjechać, ale musiołech niystety przesunyć wyjazd. Wiync poczekołech na obiod i wyjechołech po 14. Wziyłech 2 żymły z kyjzom, a w bidonach pomarańczowy carbomax <3 Był w tesco, to se kupiłech. 940g czystych wyngli za 2 dychy to se opłaco, a myśla na nowy rok zrobia wiynksze zamówiynie wszystkich koksów, to jeszcze tanij bydzie :> Ogólnie tympyraturka dzisio 3-4' !! Piyrw do Rud. Zauważyłech, że już niy ma tego porywistego wiatru, co ostatnio, wiync pyndalowało se glanc puc cycuc :D Potym na Racibórz. W Krzyżanowicach zatrzimała mie policjo... Pytali sie, czamu jada bez zadnij lampki. To padołech, że mom ja zaczepiono w kasku. I jak se okozało - niy widać jij, bo mojo pukeltasza jom zasłanio... Kuźwa dobrze, że miołech tona odblasków. Padali, że mom to jakoś umiejscowić, żeby było widać i tela. Jakoś ta lampka na opaska odblaskowo zaczepiłech, z tym, że ciut było pod kontym na wiyrch, ale było widać o! 
Już od Chałupek do Rybnika same hopki. Przeszło 70km zrobione i jak to zawsze bywo - już powiniynech coś wszamać skuli pojawiajoncego se głodu. A dzisio - nic a nic! baaa na tych hopkach mi se elegancko podjyżdżało. Koksy robiom swoje :D Z tym, że se już kończyły heheheh. We Wodzisławiu zostało mi góra 200ml i ze 15km do setki. A jednak wdupiłech se na tanksztela po 1,5l wody. Dobrze, że zatankowołech, bo na kolejnych km'ach se chciało pić jak pieron. Powiym tak: takigo rychtyk głodu niy było, ale tympo jednak ciut zmniejszyłech. Chyba wyngle se "wypolyły" :> Na prostyj ciynżko było 30+ utrzimać, ale dojechołech du dom bez jakigoś wyplompanio. I tyż od razu do lodówki jakoś niy ciulołech, jak to zazwyczaj bywo :D
Jutro tyż jakoś rajza myśla wpadnie, bo listopadowe km'y cza nadrobiać.