Klasyk! A i w rajzie se piyknie słucho :>

Co se odwlecze, to niy uciecze czy jakoś tak hehe. Niydowno miołech 3 dni fajeru + gryfno pogoda, ale zdrowie niy pozwolyło. Tera zaś mom trocha fajeru i zaś je w miara spoko pogoda, wiync niy odpuściłech! Hardkorowe ~500km pod koniec października, koniecznie kajś dalij? Yno Łódź. Do Kielc w prziszłym roku, dlo zasady. W synsie - żeby mieć stolice województw w CV :) 
Terozki momy iście gryfno pogoda za dnia, ale w nocy już doś piździ. Mimo to podjyłech czelyndź o! Wiedziołech, że bydzie cholernie niykomfortowo, no ale jakby to było łatwe, to nici ze satysfakcje :)
Wyruszyłech zarozki po 7-myj. Na termometrze kole zera stopni. Obleczone miołech: czopka + kominiarka + buff, bluza termo + koszulka BS + kurtka, nakolanniki + spodynki BS + galoty dresowe, pora zimowych fuzekli, rynkawiczki na koło i polarowe. No i jechało se piyrwsze km'y okej. 

No to zaczynomy party! © gustav

Za Rybnikiem musiołech se oblyc dodatkowo pora fuzekli, bo jednak 5' to dalij za zima..
Pyndalowołech z wiatrym lekkim, wiync spoko. Po drodze nic ciykawego. Po 100km seblykłech kurtka, polary i czopka. W Częstochowie ze 2km DK1 pod zakaz, ale co zrobisz? Nic niy zrobisz hehe a chodnikami to dej se spokój...

Częstochowa © gustav

Na termometrze max 15', ale i tak musiołech mieć np. kominiarka, bo po łepie piździało. W Radomsku pauza pod sklepym i shooping. Ogólnie pyndalowało se cołki czos elegancko :)


Łódzkie proste © gustav

Przed Bełchatowem na poboczu trocha fociłech i jakiś litwin tirym stanył za mnom i se pytoł kaj je jakoś miejscowość. A że jo niy tutejszy hehe... musioł se kogo innego poradzić. Niy mioł gpsa??




Już niydaleko Bełchatowa © gustav

A w samym wspomnianym mieście, co zaro przikuło uwaga (prócz korków hehe) - obojyntnie na kiero droga se wdupisz - tam ścieżka dlo rowerów. Ale jo se je darowoł.


Zachód bleble © gustav

Już nawet przed zachodym se zrobiło zimnij, wiync wszystki lonty zaś oblykłech. Było kole 5-7' zaś. W Pabianicach shopping. No i tyż w szczewikach piździało, wiync zrobiłech kombos: fuzekla - worek na śmieci - fuzekla - worek na śmieci - fuzekla. Jako fest amatorski sposób na chłód. No i coś to pomogło.


Łódź - oficjalnie! © gustav

Cyl już osiongnyty, po 11h brutto. Średnio miołech 27 coś. To chyba skuli tego, że z wiatrym niby i w strona cyntrum PL, czyli w dół.
A sama Łódź hmm przed wyjazdym sprawdzołech, co w tym mieście je ciekawego, jakiś monyj rynek itp. Niystety - nic z tych rzeczy. Wedle opinii, z czym se kojarzy to miasto - odpowiedzi niy były zbytnio pozytywne.. Jo jechoł głównom drogom bez cyntrum i w zasadzie tym se idzie pochwolić eehh


Jakoś oświetlono chata © gustav


Jakiś kościółek © gustav


Jakiś przistanek © gustav

No nic, trza ciulać nazot. Bez rewelacji ogólnie, ale chocioż trocha gmin wpadnie hehe. Kajś za Pabianicami do biedronki, po jedzyni na noc. W sumie miołech 3 bagietki czosnkowe, mały chlebek, pora batonów i wcześnij kupony coś a'la kołocz. Najgorsze było to, że średnio miołech ochota se dziwać na te jedzyni... I jeszcze w tyj tympyraturze.


Że niby kolacjo © gustav

Trza było oblyc special-protect :D

Dobre, koniec zabawy © gustav

W zasadze po godzinie musiołech seblyc jedno pora fuzekli, bo hajcung niymożliwy. Grunt, że niy piździało!

A ogólnie co do mojich lontów na ta pogoda: jak jechołech stałym tympym, to tak optymalnie. Yno musza se zaopatrzyć na jeszcze lepszo ochrona gymby; chocioż buff, kragiel z kurtki i kominiarka niyźle chroniły gardło. Ale jak zrobiłech pauza ciut wiynkszo, to zaro zaczło być zima. I zaś trza było ze 5 do nawet 10min kryncić, żeby se zagrzoć. Myślołech, że bydzie znacznie gorzyj.
Pić se chciało cholernie! Nawet pici schłodzonyj zawartości w bidonach niy robiło dlo mnie problymu. Problymym było to, że po drodze niy było kaj "zatankować"... Żodnyj porzondnyj tanksztele. Uroki dróg wojewódzkich w nocnych rajzach...

hehe

I zaś zawrzyte © gustav

30km przed Cz-wą sie jakoś tanksztela dopiyto pojawiyła, a do picia do wyboru abo cola, abo tymbark. Cyny wiadomo, niyhurtowe. Ale kupiłech mało butelka tymbarka. Do miasta powinno styknyć. Za już Cz-wą wiedziołech, że jest kolejno tanksztela. Tam se kupi pici. Podjechołech i co? Zawarte... I w tym momyncie zostołech zmuszony włonczyć tryb superkuźwaECO :/ 3/4 bidona mi zostoło... I jeszcze chciało mi se trocha jejść, ale na te jedzyni niy szło se dziwać. Było taki zimne i w ogóle.. suche. Ale jodłech na hama, minimalizujonc popijanie. Jakiś 10km dalij była kolejno tanksztela. I zaś tako wieśniacko. Musiołech pukać, żeby gościa z obsługi obudzić LOL! "Z picia to yno z lodówki". No choy by to strzelył! Niy kupiłech. Na całe szczyńści niydaleko w jakimś miasteczku był sklep 24h. Na jedzyni dalij niy umiołech patrzeć. Ogólnie z kożdym kilometrym słobłech, średnio tyż. Czamu? Bo mało jodłech, a wynglami se prawie niy wspomogołech. Banany, batony, nawet ulubione kołoczki z budyniym - fuj! 
Nadchodził świt, tympyratura dalij w przedziale -2 do 1 stopnia... Zmulało mie nawet doś konkretnie z tego niydospanio. Kulołech se dalij w ECO. 10km przez Tarnowskimi Górami pauza w barze na tankszteli. Ciepło, sucho - nic yno legnyć se, aż do połednia. Aż bydzie kaj z 10'...


Jedyno ciepło czynść rajzy © gustav

Ale nic z tego. Jodłech na hama te zimne, suche wyroby piekarnicze. Kupiłech wrawo herbatka. Prawie godzina se odpoczywołech. Prawie momyntami zasypiołech. Tak to już je. Z wielkom niychynciom opuszczołech tyn lokal. Na liczniku -3'. Łaaał... Do Gliwic fest spokojnie. Na tankszteli krótko pauza u znajomego i wszamani jednyj bagietki. Do Rybnika dalij spokojnie. W zasadzie se czołgołech. Marzyłech o jednym - być już w doma, zjeść co normalnego i iść spać. A droga z Gliwic do mie du dom to stos chopek eheheh... Gehenna. Niby tympyraturka kole 8-10 już, ale jedynie mogłech se pozwolić na sebleczynie ochraniaczy ze szczewików i podwinyncie rynkowów z kurtki i bluzy.

#achtenpaździernik

W doma byłech przed 11-tom. Pierwotnie miołech plan na 5 z przodu, ale niy w tym jednak stanie :/ Dokryncołbych te 15km w dobro godzina..

#umrzyty

Ale 17 gmin wpodło :> No i zaś zebrołech pewne doświadczyni, co było fest dlo mnie istotne. A pół dnia w tympyraturce max 3' - spoko hehe.