2 dni wolnego, to trza korzystać :D Oblukołech se pogoda i u nos w poniedziałek miało być 31', pora chmurek. Za to w okolicach Zakopanego ze 26' i trocha wiyncyj chmurek. Ale bez opadów. Wiync postanowiłech jechać do Bukowiny i zebrać pora zaś gmin hehe.
Po niedzielnyj 12h szychcie prziszłech du dom kole 21 i zaczyłech przigotowania. Poszłech spać kole północy, wstołech o 3:30, wyjechołech o 4:50. Ojj bydzie mie zmulać w drodze powrotnyj... :D 

Już za Żywcem © gustav

Jak już widać na powyższym foto - chmury na niebie. To dobrze, bo jo sie nastawioł na podjazdy w pierońskim hycu rzyndu 40-45'. A tak idzie pedzieć - idealno pogoda na pyndalowani. Na liczniku kole połednia miołech max 32' jakoś.

Stryszawa © gustav

Droga bez Stryszawa - fajno hopka :D im wyżyj, tym bardzij nachylono hehe


W drodze na Krowiarki © gustav

Tego mi trza było! :>

Lejymy woda © gustav

Na krowiarkach parking zawalony.. :D ale niy fociłech - wszyscy owe miejsce znajom.

Po ta gmina musiołech zjechać z trasy jakiś 5km monyj :P

Zaś jedna wiyncyj © gustav

I potym aż do Nowego Torgu (:D) prosto i jakoś nudno. Tatry fest przikryte ciymnymi chmurami.. zaczyło mi se to niy podobać.

Sam już w drodze direkt na południe. Chmury w oddali ehh... Zakłodołech teza "z wielkij chmury mały dyszcz" 8<

Czorne chmury już widać © gustav

Jo już zakłodoł wariant, że byda musioł popytać o nocleg (dobrze, że 2 dni wolnego). Co te prezyntery godali we TV - iście letnio aura...
Ale jechołech na ryzyko, bo drugi roz sam jechać niy byda!

W Poroninie © gustav

Ujowo, ale stabilnie (jeszcze) :D

Do Bukowiny droga tyż fajno ścianka, widoczki na Tatry klasa! Ale dalij były jeszcze lepsze :)

Bukowina taki se © gustav


Bukowina Hotel © gustav

BEAUTY OF POLAND!

Czarna Góra © gustav

Do Trybszu jeszcze konkretniejszo ścianka, porównywalno z tom w Stryszawie, ~15% myśla bydzie (jak ktoś umi to sprawdzić, to byda wdziynczny:))


Na ściance © gustav

To tela jeśli chodzi o focynie - od południowego-zachodu czorne chmury nadciongały... wiync musiołech spierdzielać jak najdalij na północ. Normalnie siwo, dupno mgła! W tyj adrenalinie szłapy dostały boosta normalnie, jo sie nic niy oszczyndzoł. Ale chmury i tak były gipciejsze i dostołech sie w "objyncia" dyszczu. To było kurde niyuniknione. Niy sipiało, ale tyż niy była to ulywa. Ale przi 21' jeszcze momyntami sie przegrzywołech hehe. Dojechołech do Rabki i tam krótko pauza pod paryzolami. Zgodołech sie z Karelym z San Andrychowo City, że jak bydzie dalij loło i byda przemoczony, to wbija do niego po zestaw anti-dyszcz :D Wbiłech do knajpki po 5 worków - jedyn dołech se pod kask, reszta po 2 do szczewików (stary sposób). W takim oto zestawie amatora jechołech dalij w dyszczu. I tyn zestaw działoł w japoński sposób, czyli Jako Tako :D :D Ale w miara było okej.
Pierwotny plan zakłodoł jazda z Rabki DK7 do Jabłonki celym zebranio 2 kolejnych gmin. No ale niy mogłech jechać direkt w czorne chmury... Kiedy indzij tam podjada.

W okolicach Makowa już przestoło padać, drogi schnyły. Jechało sie zarombiście. Szłapy podowały jak ta lala :D
Jeśli chodzi o jedzynie - pora bananów, 4 żymły i głównie same kołoczki :> Tak mi dzisio smakowały, jak nigdy indzij :P
W Wadowicach wbijom do sklepu po ostatni zakupy. Była godzina 20:30 jakoś. Prawie 90km du dom jeszcze, wiync dokupiłech 5 kołoczków jeszcze - to powinno styknyć. Zadzwoniłech jeszcze roz do Karela, a w miyndzyczasie jakiś typek z piwym w rynce mi pierdzieli, kaj chca jechać, kieryndy powinienech jechać itp Jo godom bez mobilnoka, a tyn dalij swoje, noo kufa maać. Odpoliłech mobilnego gps'a, full głos i do kapsy. Z Brzeszczy do Wadowic tymi skrótami zajada bez problymu, ale odwrotnie jeszcze nigdy niy jechołech (tym bardzij w nocy), a tam oznakowani trocha średni. Ale gps zrobił swojo robota należycie :) I potym już ze 60km prosto du dom. ALE zamulani sie zaczyło... Brak snu sie uwydatnioł. Kurde tragedia. Zaś jazda na granicy wypadku. To je drugi najgorszy kryzys. Piyrwszy to je, jak mosz dość dziwanio sie na jedzynie. Dopiyro w Żorach na oświetlonych drogach trocha mi przeszło. A baterie przednij lampy tyż musza wymiynić - już 4. wielko rajza i 4. pełno noc majom za sobom.

M.in. taki rzeczy momy na rybnickich rondach :D

Fotka z Alojzym © gustav

Te prawie 90km zrobiłech na 3 kołoczkach i litrze wody. W Rybniku już jechołech relaksacyjnie. Zaś niy wyplompany, yno śpioncy :D W nogach nic niy czuja po tyj rajzie. Kontuzja w kolanie już mi chyba przeszła, bo cało trasa jechołech w systemie "korbowania": góra-dół. Czterogłowe se mogły w końcu odpocznyć momyntami.

400km i 5 nowych gmin...