Czyli mój piyrwszy udział w życiu w poważnyj imprezie kolarskij z cyklu "UltraRajza" (czyli direkt coś dlo mnie hehe). W końcu miołech okazjo porównać swojo forma z rychtyk Tytanami w tyjże dziedzinie. Obrołech dystans 450km, bo:
- 150 i 300 to żodno satysfakcjo dlo mnie (chyba żebych cufalym zahoczył o podium.. dobry wic..)
- 600 w 24h jeszcze niy mojo liga (chyba, że za tirym hehe). Tyn dystans yno/aż 7 twardzieli ukończyło! Respekt!

Przed wyjazdym do Radlina (3km od chaty) obejrzołech se pogoda i tak: słonko w burzowyj atmosferze (czyli pierońskie wiatry z południa i dyszcz w różnorakij odmianie jak najbardzij bydom na miejscu ehh). Ale że niby szansa na opady była max. 10%, no to za cholera niy mo prawa być ulywy! Beztoż jo lontów anti-dyszcz nie broł żodnych.

Żodnych.

Wziyłech yno na noc sprawdzony zestaw: nakolanniki, chusta, kominiarka i bluza termo. Ryzyko dość ostre..
No i tyż niy jodełch obiodu. Yno wszamołech 5 ciastków, 2 kawy i tam mone coś jeszcze :>
Na start przijechołech 15:40. Ludzi masa - kole 150. Ze znajomych z BS'a byli: Funio, Janekbike, Tadzik1963 i Raptor8999 - z nim ugodołech sie na wspólne co najmij piyrwsze 2 pyntle spokojnym tympym. 

Fest było spokojnie...

Jo z racji mojij koszulki BS może byłech rozpoznany przez niekierych, ale jo innych prócz Waxmunda już niy kojarzył hehe.

Ogólnie to bydzie mój piyrwszy wpis z długij rajzy yno z jednym zdjynciym mojigo autorstwa (bo na maratonie każdo sekunda sie liczy! wiync kaj tam myśli o knipsowaniu):


Tela fotografów robiło nom foty przed startym, na trasie i nic fajnego niy umia znolyźć :/
Ale od czego jest np. Mroczny45 :))

Po symbolicznym kółeczku po Radlinie zostoło naszyj grupie ze 20min, wiync z racji, że wolołech mieć żołondek trocha zapełniony, to z Pawłym jechalimy do spożywczego.

Niy po cigarety abo % czy jakiś leconce w kulki emenememsy :D

Jo se kupił 2 bagietki i 4 kołoczki jakoś. Czego niy zjodłech - zostawiłech w mercedesie Pawła, żeby mieć jakiś zapas po skończonyj pyntli, jakby na punkcie było za mało owego jedzynio :P
Czorne chmury nadchodziły. Wszyscy już chyba mieli nasrane w galotach. Jo tyż :D Czamu niy wziyłech chocioż kurtki?! :D Ojj bydzie sie działo.
Taktyka - moga już te słowo wyciepać z mojigo słownika, jeśli chodzi o maratony. Jo mioł w planach piyrwsze 2 pyntle właśnie na spokojnie (średnio góra 26), a na ostatnij - otworci DRS'a i pyndalować wiela sie do! ^^ W końcu przeca w pagórkowatym terynie czasówki na takim dystansie jeszcze niy jechołech. Jechołech co prowda dwukrotnie ta pyntla i przi średnij 30 było czuć te hopki w szłapach.

17:40 wystartowała naszo 3. grupa. Za Wodzisławiym już średnio ze 33 :D ojojojoj Jedni gonili 2. grupa. Inni z Januszym na czele (w końcu koszulka BS zobowionzuje do czegoś hehe) tyż ostro pyndalowali. My z Pawłym troszyczka spokojnij. Noo i kajś w Pawłowicach już my ich dogonili.

"Janusz, kaj to tak gipko zadupczocie?!" :D

Odcinek na wiślance to był JEDYNY odcinek, kaj jo jechoł w rychtyk grupie, gipko, za kimś - na kole.
W Skoczowie dogoniła nos wiynkszość 4. grupy. Ja piernicze - przepisy godajom 15 ludzi max., a naszo grupa liczyła łohohoho 20-25 hahah. Pora km przed Ustroniym Paweł zwolnił, jo na niego poczekoł - w końcu mielimy swój plan: na spokojnie.
Na punkcie trza se było zadowolić żymłami, kołoczkiym i batonym. No i była tyż woda, izotony, kawa czy herbata? :D

Po opuszczyniu punktu kajś se stracił Paweł. Jechołech do 2. ronda 10km/h i go niy widziołech. Na światłach czekołech i dalij go niy było. No nic - jechołech z nadziejom, że mie dogoni. Przed Cieszynym mijo mie grupka na 300km. Na rondzie w Cieszynie chytom aero za tirym i direkt pod tyn podjazd zapierniczom hehe. No ale trocha tyn tir se rozpyndził i niy mioło synsu dalij zapierniczać na maxa. Ale dogoniłech ta grupka na 300km hehe i z nimi jechołech. W Zebrzydowicach na punkcie dogonił mie Paweł. Tam do jedzynio yno baton i banan. Wyruszylimy dalij z dwoma innymi.

hahahaha


Next punkt w Tworkowie. Tam już nic do jedzynio, yno woda... Ubrołech wszystko prócz kominiarki. Było ze 18'. W Radlinie meldujymy sie po 6h brutto. Średnio 29 jakoś, ale dobrze sie czułech. Do jedzynio gorki bogracz z żymłami. Jo sie tym napchoł dość fest hehe. Ubrołech kominiarka, bo już po łepie było czuć pot/wilgoć, a tympytarutka spodła 14'.
Kilometer od odjazdu jo se wspomnioł, że szło zabrać banany. Ja pierniczeeeee!!! Musiołech zajechać na tym do Ustronia ehh

Trocha o pogodzie: momyntami mikroskopijne kropelki, kaj-niekaj mokro droga, wiatr w miara spokojny (na poczontku na wiślance). Tympyraturka kole 3 w nocy uwaga - 21' !!
Już dojyżdżajonc do Ustronia zaczyło fajnie wioć... Już na drodze do Cieszyna momyntami sztorm heh. Ale na tyle "ciepły", że musiołech zdyjmnyć kominiarka, bo sie przegrzywołech. Yno jo to robił w czasie pyndalowanio i ani niy wiym kiedy - wypadła mi Niy było synsu jij szukać, trudno. Z nami od Radlina zabroł se jedyn starszy gościu. Mioł trekkinga, niy mioł pyndali SPD - jechoł równo z nami cołki czos - wielki szacun dlo niego, siła mo pierońsko! W Zebrzydowicach dalij trwoł karnawał :D By nie tyn maraton... :D
Mniejwiyncyj w okolicach Cieszyna odnowiła sie mojo kontuzja prawego kolana... Jo wiedzioł, że to może sie stać, kwestia była yno: na kierym kilometrze i jak bardzo dotkliwe to bydzie? Przez te kolano całkowicie miołech wyłonczony systym "ciongnycio korby na wiyrch", a tym samym niy było możliwości rozkładu sił na dwu- i czworogłowe. A pyndalowani w trybie: lewo szłapa ku wiyrchu - prawo na dół, niy było za wygodne. Ale z każdym kolejnym kilometrym tyn ból sie niy powiynkszoł, na szczyńści. Mogłech jechać niezłym tympym.
W okolicach Łazisk Paweł trocha sie zaczył oszczyndzać. Jo tyż (i kolano se odpocznie), gościu na trekkingu systematycznie sie oddaloł. Jak my wjyżdżali na punkt do Tworkowa, to on wyjyżdżoł. Jo żeh sie czuł o dziwo bardzo dobrze! Paweł już ponoć średnio. Beztoż postanowiłech, że zaryzykuja i pojada SOLO POŚCIG! Czyli matematycznie - 180km do mety. Żeby nie było, to je istotne - z Pawłym i tyż za kimkolwiek innym niy stosowołech jazdy "na kole" od czasu wiślanki na piyrwszyj pyntli. Była jazda 3-5m za kimś abo obok siebie.
No nic, była jakoś 5:20 i zaczyłech "czelyndż". Piyrwszy do złapanio - trekkingowiec. Jo do Radlina zapierniczoł ostro, średnio 30 jak nic. Już mi sie pojawiył na horyzoncie przed Radlinym. Chyciłech go direkt 200m od punktu, bo pomylił drogi :D Gipko odbić dyskietka, zostawiłech na tym punkcie "nocne lonty", wpompowołech izotoniki w siebie, zjodłech co sie doło, banany do kapsów i w droga! Średnio: 27.9. Niy umia stwierdzić, czy kogoś udało mi sie dodatkowo przegonić na tym punkcie, kilku kolorzy siedziało przi swoich kołach. Niy patrzołech na ich numery. Przed Jastrzymbiym wyprzedziłech kolejnych 3. Jo jechoł tak zmotywowany, tak "wypoczynty" że nie byłech w stanie zrozumieć: "skond wy mie je jeszcze tako moc?". Na wiślance zaś mocny wiater ehh.. tak jak uwielbiom ta droga, tak tego dnia jij niy ciyrpiołech. Ale przegoniłech jednego. W Skoczowie na Orlynie zaś kombo x3 do "kolekcje" - robili se pauza pod paryzolym hehe. Dojechołech do Ustronia na punkt, tam zaś 2 było. Od tego momyntu na widok słodkigo jedzynio... moji oczy niy chciały tego widzieć. Ale jejśc trza było, innyj rady brak. Gumy do żucio w pewny sposób neutralizowały tyn "niesmak".
Samopoczucie jeszcze w miara okej, o dziwo. Cieszyłech sie, że już jada na kolejny punkt, bo sie zaczyły hopki, a mie już żić bolała od tego "plastikowego" zica. Jednak Selle Royal Freccia to je na długich rajzach konkretno i wygodno kanapa! :> kominiarka znalozłech - leżała przi drodze haha. W Zebrzydowicach trafiom na punkcie jeszcze jednego gościa. On to mioł machina konkretno - 6,5kg czasowo lalunia na 10cm stożkach i elektronice. Ale już złapoł ze 3 pany. I żeh mu użyczył dyntki. Sportowe opony - niby szybsze, ale i podatniejsze na "laczki". Moji Durano - prawie 6kkm i jeszcze niy zawiodły :) Wziyłech se sobom 2 banany i 2 batony i na tym miołech przijechać aż do Radlina. W Tworkowie doganio mie jedyn zawodnik. Zrobił krótszy pitstop o minuta wiync zaś musiołech gonić. Słońce grzoło dość mocno, na liczniku 35'... Oblywani sie to był standard heh. Ale dogoniłech i przegoniłech. W Syrynii na ściance było kosmicznie hardkorowo, ale dołech rada! Potym już do Radlina w zasadzie prosto droga. Te ostatni 10km to już czułech braki w żołondku. Myśla, jakby było ze 5-10km wiyncyj, to odcinka gwarantowano.
Ale dojechołech! Piyrw co zrobiłech na mecie, to niy gipki lecynie odbić dyskietka, yno cało woda z bidonów na siebie wlołech :D Jeszcze z kimś krótko pogodołech. Straciłech góra 2min, ale w ostatecznym rozrachunku i tak do osoby przedy mnom traciłech 8min, wiync luzik :) By niy było hycu, to pewno miołbych ochota dokryncić do 500km heh. Pościg zakończony sukcesym - przegoniłech 11 osób :)) Średnio utrzimano z drugij pyntle!

Potym o 20:00 było rozdani dyplomów, pucharków, jakiś filmik itp. Moji piyrwsze, rowerowe nagrody hehe.

Dystans 450km+ (przewyższynia ok. 3800m) ukończyło niby 75 osób, jo z moim czasym uzyskołech 26. miejsce! Jak na piyrwszy maraton i w zasadzie jazda SOLO - bombon! :)