W sobota miała być Koszarawa - ale pogoda ciulato i niy kożdymu pasowało. W niedziela zaś atak na Słowacjo - Paweł w ostatniyj chwili padoł, że jednak niy jedzie. Jo mioł obsesjo na dłuższyj rajzie max. 500km to roz, bo cołki tydziyń niy jeździłech Speedym, a dwa - padołech, że w maju musza zrobić owe 500km. Kuba z B-B mi to wypomnioł już :P No nic, pogoda na poniedziałek miała być wporzo. Postanowiłech "wypyłnić" wnynka gminno w okolicach Wrocławia ^^ Bo tak to szpetnie wyglondało na mapce hehe
Zrobiłech se zapasy na nocno trasa, bo jak wiadomo - w nocy żymłów, kołoczków, chlybów (krojonych; przyp. red.) niy kupisz za pierona. 5 bagietek 170g i 2 czekolady.

Zatankowany :D © gustav

Jako że noc miała być już całkiym całkiym, to prócz stroju BS wziyłech yno bluza termoactiv i ochraniocz przed luftym na kark. Wyjechołech jakoś ~23:45. Ogólnie miołech plan zrobić 500 w 24h. Za miesionc maraton Sokoła w Radlinie, kaj byda musiol zrobić 450km w 24h (kwalifikacjo na BBT), wiync byda mioł tako terozki forma sprawdzianu formy.

W nocy nic ciekawego; tympyraturka nojmniyjszo to było 11,4'. Ale jechało sie gites, chcocioż te 3' wiyncyj by mogło być. W sumie był spad terynu, a że niy było "w-gymbo-luftu", to krynciło sie elegancko.

Poranne mgiełki © gustav

W Oławie zjechołech na droga wojewódzko, żeby pozbiyrać nowe gminy :P DW455 - w 70% TRAGEDIA!!! Jedzynio mi stykło na cało noc. O 5 rano już był otworty lewiatan i tam kupiłech woda. Ogólnie starołech se jejść w czasie pyndalowanio - to tako jedna bagietka 170g zaczyłech jejść np. w Oławie, a skończyłech dopiyro kajś w okolicach Jelcza :D We Wrocławiu byłech przed 8:00 jakoś. Dziyń dobry po dwóch latach - po roz drugi! :) Tam kajś przi drodze w parku musiołech seblyc koszulka termo, bo chyc już było pierońsko. Musza prziznać - w tym mieście je fest dużo rowerzystów! I to już tak wczas rano! kaj sie nie pozaglondołech - to kieryś pyndalowoł. W np. Rybniku to zapomnij o takim czymś... W ogóle infrastruktura dlo rowerzystów na fest wysokim poziomie. Ale żeby bez te miasto przejechać, to trza minyć piyrw 20 tysiyncy skrziżowań ze światłami. Wielki miasta tak to już majom heh.

Most Grunwaldzki © gustav

I widok z tego mostu © gustav

Wroclove part1 © gustav

Wroclove part2 © gustav

Wroclove part3 © gustav

Wroclove part4 © gustav

Przed Wrocławiym średnio miołech prawie 27. Ale dziynki jeżdżyniu 10km/h po rynku, zwalnianiu co chwila na światłach, to średnio systematycznie spodała hehe. Już na samym wyjeździe trocha droga popierniczyłech, a że było chyba z 6-8 pasów, to sie zaczyła fajno komiedio :D :D musiołech sie dostać na drugo strona haha dobrze że były wysepki co 2 pasy. Jakoś te przeskakiwani mi sie udało :>
Jeszcze gipko na tanksztela po woda i wyjazd po nowe gminy! Z jedzynio dalij nic nie kupowołech, ale w takim hycu to średnio sie chciało jejść. 

W strona S8 © gustav

Od południa już ciymne chmurki było widać hyh...
Z racji, że droga do pewnyj gminy to była ponoć sama kostka bez 3km, to musiołech zmiynić plan. Postanowiłech bez nerwów jechać prosto do Zawoni. Czyli zamiast planowanych 9 nowych gmin bydzie o jedna mynij.
Zaczyły sie podjazdy.

W drodze do Zawonii © gustav

Drogi wojewódzkie do samego Namysłowa tyż niy ma co godać... Porażka. Mało kiedy równy asfalt. Dopiyro już od Namysłowa zaczła sie krajowo. Wiadomo, co to oznaczo dlo komfortu podróży :) Ogólnie podczos cołkij tyj rajzy niy było jakigoś fest wielkigo ruchu. I tyż ani razu niy zaobserwowołech negatywnych zachowań ze strony kierowców. Tirowcy jak zwykle niy śpieszyli sie z wyprzedzaniym. Szacuneczek :)
Ot tak wymyśliłech nowe zastosowani dlo mojij lemondki:

Lemondka - same pozytywy! © gustav

Wciepać jeszcze to butelki jako wielko słomka i szafa gro :D To je ostatnie foto, bo potym nie wiym czamu, ale mój smartfon sie prawie całkowicie rozładowoł, może żeh do końca gps-a niy wyłączył abo co... fotek już niy szło cykać :/

Po jakimś postoju zaczyło mie boleć troszka lewe kolano :/ Czy był to efekt braku jazdy na wysokij kadyncji? Po jakiś 300km kolana majom prawo już czuć zmynczyni. Ale pyndalowołech na zmiana, używajonc w miara równomiernie wszystkich miyńśni w szłapach. A tyż super twardyj kadyncji niy stosowołech - wielki blat z góra 5. "nojlżejszom" koronkom. Chyba chynć uzyskanio nojlepszego czasu tych planowanych 500km mie przistopowała... :/ Zwiynkszyłech kadyncjo i coś kolano już niy bolało tak fest.
Terozki coś o jedzyniu - już po 300-350km miołech dość dziwanio sie na nie. Już nawet banany mi sie zbrzidły. Cokolwiek słodkigo i już mi sie niy dobrze robiło... A jakoś niy miołech ochoty jejść suchych żymłów abo chleba. Ale trza było ciś na hama, bo bez jedzynio nie pojedziesz. Pizza tako mało udało mi sie kupić, dobrze że niy była słodko... Gumy do żucia i dużo wody - to jakoś tak neutralizowało "górny" układ pokarmowy. W Tarnowskich Górach było widać ciymne chmury od południa. W Gliwicach jak już byłech przi A4, to sie tak blyskało, że ja piernicze. Choby z jakigo filmu katastroficznego. Zaczyło padać, wiync jo pod przistanek. Ale se myśla, że jak bydzie konkret ulywa, to taki malutki przistanek nic niy do. Corozki mocnij padało, wiync wziyłech koło i zapierniczołech nazot w strona cyntrum na piyrwszo napotkano tanksztela. Tam był taki starszy, spoko gościu z dozoru technicznego, od nalywanio paliwa itp. Dużo  my bez tyn czos pogodali. Nawet dostołech gratis herbata hehe Bo tak to bych musioł ze 5zł zabulić na pewno :> Byłech tam prawie godzina. Już przestoło sie fest blyskać, yno lekko kropiło, wiync po co czekać - po wszamaniu pozostałyj 1 pizzy ruszyłech. Fajnie wyglondało, jak drogi parowały na tle drogowego oświetlynio :) Jakoś zajechołech na tyj pizzy, chocioż już od ostatnich 10km brzuch se domagoł jedzynio hehe. Przijechołech tyż jakoś o 23:45, czyli równe 24h brutto. Musiołbych zjeść coś porzondnego, żeby myśleć o dokryncaniu do 500km. Bo nogi zmynczonie niy były i innych kryzysów tyż niy było. Chocioż jak poszłech spać, to chyba po 2min już usnyłech heh.

Spokojnie mógłbych odejmnyć z 10 do 15min od czasu, głównie "pobyt" we Wrocławiu i inne przerwy. Ze średnij jeżeh zadowolony. Ale za fest szarpołech na piyrwszych 200km, co sie potym źle odbiło.

+8 gmin