To jest jedyn ze songów, dziynki kierymu ta rajza doszła do planowanego skutku, czyli bariery half1000 :)
No i co by sam pedzieć na poczontku? Na Opolszczyźnie zostoło mi 12 gmin do 100% tego województwa i już jakiś czos tymu zrobiłech szkic trasy, żeby zebrać je wszystki za jedynym razym. Wyszło niycałe 500km. Na maj, jak już bydzie cieplij w nocy za oknym - idealnie. No ale że mi czasym odbijo, abo że już od 2 tydni niy jechołech dłuższyj rajzy, a pogoda na ta niedziela zapowiadali słoneczno... No cóż, fajnie by było ugrać 500-ka na koniec kwietnia, wiync musiołech podjonć te wyzwani! :>
W sobota od rana pogoda była ciulato, że to tak ujmia :P Padało. Bez połednie trocha przejaśniyń, nawet odpolyłech mojigo Ogara 200, ale coś musza go podregulować, bo gasnył na fol gazie :D Kole 15 zaś padało. Sztyjc oglondołech pogoda z nadziejom, że dzisio wyjada. Kole 19 już niy padało i wedle prognoz już niy miało w ogóle padać! Nooo to cacy - poszłech do sponsora polskich kopaczy bieganych po "paliwo" ^^

Przigotowania © gustav

Te grziby w niebieskim kastliku to ich w trasa niy brołech :]
Z lontów to wziyłech: góra - jakla termo, koszulka kolarsko i kurtka na dyszcz, dół - spodynki kolarskie, nakolanniki i galoty taki do lotanio. Oblykłech jedna pora grubszych fuzekli, a 2 pory wziyłech w zapasie. Zjodłech ryż, wziyłech do taszy, co trza i w droga! Była 21:40.

Piyrwsze kilometry hyc normalnie! 13-14'... Miołech obleczone ochraniacze termo na szczewikach, rynkawiczki polarowe takie na zima i już po 5km musiołech to wszystko seblyc. Oblykłech rynkawiczki kolarskie normalne. Przed Raciborzym kapłech se, że zapomniołech mojij podryncznyj mapy, kaj miołech naszkryflane wszystki gminy do zdobycio... Miołech gps-a we fonie, ale niy pamiyntołech niekierych gmin. Zaro zadzwoniłech do brata, żeby mi je posłoł sms-ym :)
Ogólnie na ta dupno razja miołech tako taktyka - wiynkszo kadyncja, niż zazwyczaj; tympo spokojne, bez żodnyj nagonki na jak nojlepszo średnio.

Bez ŻODNYJ!

Tak, żeby spróbować przijechac du dom w dobrym stanie hehe.


Te lampki to Racibórz hehe © gustav

O 23:30 opuściłech Ślonsk.

Widzymy sie za jakoś doba ^^ © gustav

W strona Prudnika jechołech samymi pustkowiami, kaj za dnio se nic niy dzieje, a co dopiyro w nocy.. Nic szczególnego.
W Nysie, Xtnt by padoł na to "atrakcja" - mgłyyy! :> Te teryny to skupiska zbiorników wodnych, ale tyż i w prognozach godali, że tyjże nocy majom być obfite mgły.

Mgła w Nysie © gustav


Tympyraturki © gustav

Nojniższo tympyratura była tako, jak na tym bildzie powyżyj. Ale czynsto czułech duchota normalnie. Na tankszteli kupiłech woda, była trocha zimno, ale piłech se jom, jakby było ze 30'. Co je warte uwagi - dalij jechołech w zwykłych rynkawiczkach i bez ochraniaczy i niy czułech zimna! Ciekawo sprawa...
 
Do S-W czyńści województwa dojechołech, tak jak se to zaplanowołech, czyli o świcie - po to, żeby zbiyrajonc nowe gminy (w tym przipadku Kamiennik), do kierych dojazd prowadzi jakimiś bocznym drogami, niy mieć problemów z orientacjom, niy zauważyniym znaków itp.


Trocha wyjechołech za daleko :D © gustav


W strona Kamiennika © gustav


Porankowo © gustav

Mgły cołki czos trzimały, roz słabij, roz mocnij.


Iście gryfny widok!!! © gustav


Sam niy trza komyntorza © gustav

Te 2 fotki powyżyj uznowom za nojlepsze z całyj rajzy!! :))

Na jednyj z pauz zauważyłech żmija w moim kole :P

Ultegra-killer © gustav


Kajś tam dalekoo © gustav

DW od Grodkowa kosmos!


Słitaśnieee musi być! © gustav

W Brzegu pauza, małe zakupy, schowani zimowyj czopki. Była godzina 9. W zasadzie od tego miasta mgły ustompiły całkowicie i zaczyło ładnie świycić z nieba :>


Brzeg - pauza © gustav

Kajś tam dalij musiołech już seblyc kurtka, niy szło strzimać z tego grozcio.


Artystycznie :)) © gustav

Im bliżyj połednia, tym wiynkszy hyc. Chciołech seblyc jeszcze koszulka termo i te galoty. Ale już miołech tak naładowane w taszy, że szok.. W ogóle je to mojo piyrwszo tako wielko rajza, w kieryj jada z taszom na plecach (poprzedni "rekord' 300km z groszami). No nic, niy chciołech docionżać pleców, wiync musiołech te pora godzin jakoś wytrzimać w "ograniczonyj wymianie termo". Ale że na liczniku było max 28', to jeszcze tragedii niy było.

Co to je rychtyk tragedia - wytłumacza potym :P

Do Kluczborka lajtowo jazda, w tym momyncie zbliżołech se już do granicy 300km. Ale już mie trocha żić bolała eehh. I czekoł mie skok niy po drodze. Po 2 gminy w N-E czyńści województwa. 20km w jedna strona. Fajne uczucie - być jednego dnia w dwóch przeciwległych rejonach województwa. Fakt, Opolskie to je atom w porównaniu z takim Mazowszym, ale zawsze coś :))

Kajś tam wbiłech do sklepu. Prziloz jakiś gościu do mie:
- Dziyń dobry, wiela to dziś kilometrów robicie?
- 500..
- O Jeezuuu

:D

Miołech fest wielkigo smaka na coś słodkigo, jaki kołoczki abo kreple. Były. Ale wczorajsze heh.. Ale był CHLYB KROJONY cebulowy, zapeklowany w oryginalnym opakowaniu, wiync teoretycznie powiniyn być świyży. Chyba wiedzieli w tym sklepie, kto ich dzisio chce odwiedzić xD


Krojony chlyb © gustav


To już tyż z łepy! © gustav

No to jeszcze zostoły 2 gminy. Come back do Kluczborka i lecim krajowom na Opole. Było czuć niysłaby wiater z południa ehh. Z jednyj strony troszyczka spowalnioł, z drugij (jako, że był chłodny) orzeźwioł. Cołki czos kisiłech se w tym hycu, ale pyndalowołech w niynagannym stanie. Zjazd z DK na Murów i już zaczyły sie piykne drogi... Dziury jedna na drugij, granulowatość nawierzchni itp. Rzadko kiedy idealnie równo. Dlo fanatyków MTB to bez znaczynio (baa mone i nawet frajda), ale dlo szosowców katorga.
Jak już wjechołech do Opola, to gotki o darymnych drogach niy było mowy. DK45 jakiś 80km aż do Raciborza! :)


Odra - Opole © gustav

Za Opolym mało pauza na przistanku. Miołech tam jeszcze jakiś banany i dużo chlebka. Ale pici sie kończyło. Sklepu żodnego przi drodze, dopiyro przi A4 na tankszteli mogłech se "ożyźwić" :> 4 litery już tak niy bolały, jak to bywało w okolicach np. Kluczborka. Już se przyzwyczaiły monyj hehe.


DK45 zachód © gustav

W zasadzie od Opola czułech już zmynczyni w szłapach, beztoż postanowiłech jak najczyńscij używać miyńśni 2-głowych. Cołki czos w miara wysoko kadyncja i luźne tympo. Średnio niy powalała, niestety z kożdym kilometrym spodała. Mniyj-wiyncyj od 430km zaczynało se kryncić tragicznie. 4-głowe tak mie napierniczały, że ledwo co na nich stołech :/ Dodatkowo zostoł mi tyn chlyb - jakoś połowa, banan, a o otwortych sklepach przi drodze mogełch zapomnieć. Musiołech zamiynić tryb Standard Eco na Critical Eco :( Wszystkigo miołech już dość! Chciołech już być jak najpryndzyj w momyncie otwiyrania drzwi z domu ze świadomościom zrobiynia 500km. Pojawioł sie powoli kryzys spanio. Co jakoś góra 20km pauza, żeby pojejść konsek chlybka. Niy umiołech już na niego sie dziwać, już nawet wyschnył i niy był taki dobry.. Droga do Raciborza i potym do Rybnika same chopki. Średnio grubo poniżyj 24. Jak był zjazd, to zaczyłech pyndalować dopiyro, jak pryndkość spadła poniżyj 10km\h. Na podjazdach przeważnie przełożyni 1/1. I jedyn z głównych czynników "dołujoncych" - pogoda. A raczyj niy potrafiynie sie do nij dostosować lontami. Zakłodomy tympyraturka niy wiyncyj jak 15'. Na jednyj pauzie już mi było dość zima, wiync ubrołech czopka, kurtka, polarowe rynkawiczki. W trakcie jazdy za to gorołech, szczególnie na podjazdach. Kurtka rozpiyłech wiela sie dało. Rynkawiczki schowołech do taszy. Po łepie tyż wrawo, ale jakbych ściepoł ta czopka, to na 100% bych chcioł jom nazot oblyc, jakbych był na jakimś konkretnym zjeździe. Musiołbych mieć najlepij kominiarka, kieryj niy wziyłech ze sobom. I co w tyj sytuacji zrobisz? Nic niy zrobisz.

To je właśnie tragedia. Trwało to aż do samego Rybnika.

W Rydułtowach drogi suche, ale już po wjechaniu na obszar Rybnika fest mokro i padało lekko. W tym momyncie miołech 485km i sztyjc wszystkigo dość. Postanowiłech, że zakończa tyn trip z jakimiś 490km na koncie, żeby jak najpryndzyj iść sie umyć/pojejść/spać. Z wielkim niedosytym, ale już o niczym innym niy myślołech. O dziwo - szłapy mie już jakoś niy bolały hyh...

Byłech pod domym. Lekko kropiło dalij. Se myślołech zaś: To niby mie nazywajom "rybnickim terminatorym", kiery z kołym wyprawio niystworzone cuda? To jo był w stanie dokryncać pieprzone 70km do pieprzonych 800km, a teraz niy umia dokryncić pieprzonych 10km?? O niyyy!!

Oblykłech ochraniacze na buty, odpolyłech mp3 i zapuściłech yno jedyn song, kiery bydzie mi sie powtarzoł, aż uzyskom half1000! Tyn song je na poczontku tego wpisu właśnie. Jechołech 5km w strona cyntrum i nazot. Wnerwiony fest, ale i jakoś zmotywowany. Ta muzyczka tyż robiła swoje. Wtedy wszelki kryzysy niy istniały w mym słowniku!
I dokrynciłech te pieprzone 10km do tych pieprzonych 500km!! I PAPA ZGORANO w tym momyncie!!!!!!!! Czelyndż wykonany. Z trudnościami, ale wykonany! Były może ze 3min. do północy.

Małe podsumowanko:
- +16 nowych gmin!
- Opolskie: 71\71 gmin! W ogóle niy przypuszczołech dodowajonc wpis w sylwestra, że byda mioł z końcym kwietnia 100% Opolszczyzny i 99,5% Ślonska. Planowołech tyn "wyczyn" na maj/czerwiec hehe :)
- Czas brutto: 26h 20min
- Mojo piyrwszo długo rajza, na kieryj 90% czasu jazdy jechoełch na małym blacie - 34z.
- Jedzonko: jakoś mało tego było, jak na owy kilometraż - niycały chlyb krojony, strucla truskawkowo, 4 żymły, góra 10 bananów i z 8 batoników. Kupiłech 4 abo 5 butelki wody po 1,5l.
- Tympyraturki w czasie jazdy: 14 >> 7 >> 28 >> 12
- Niy przijechołech odciynty :P
- Terozki jak to pisza: zmynczynie w szłapach porównywalne do zeszłotygodniowyj ustawki na Góra św. Anny (140km, śr. prawie 32). Zero bólu w kolanach.