Czyli piyrwszy w tym roku mój poważny "wypad" w gronie szosowców :> Idea padła pora dni tymu, wiync od razu sie na to pisołech. Bo trza w te czasym dupne rajzy wkomponować coś innego, jakoś konkretno czasówka. Na śniodani, jak to we Wielkanoc - bez ryżu, czy makaronu.. Był chlyb, szinki, jajka i te sprawy. Chocioż napchołech sie tym doś fest, to miołech wizja, że na wiele km'ów mi to niy styknie.
Ustawka w Rybniku o 11-yj, stawiło sie 6 osób. I ruszyli my na destinejszyn :D Wiater doś nawet mocny ze wschodu, wiync jadonc na zachód to wiadomo - kole 40 na prostyj (a miało być świonteczne tympo hehehe). Jechali my z nadziejom, że kajś bydzie w dzisiejszy dziyń otworty sklyp (jo mioł w kapsach yno 2 banany!). Kajś po drodze dołonczył do nos jeszcze jedyn kolorz.

Mało pauza © gustav

Tympo dalij ostre, ale przez to, że wiater jakoś niy wodził nom :) Przed podjazdym na opolski mount ventoux miołech średnio ~33. Na podjeździe gorołech, mimo jazdy w sponynkach i koszulce kolarskij. Dojechalimy na szczyt i zaro szukalimy punktu tankowanio :P Była kawiarynka z lodami, goframi i np. coca-colami. Za liter cole i kryncony lód dołech 9zł... Ale coś trza było wszamać hehe biznes tam majom pieroński :D Ogólnie miołech zrobione 70km i o dziwo czułech sie dobrze. Głodny jeszcze (!) niy byłech; widać, poświyncone składniki śniodania trzimiom bardzij, niż 2 torebki ryżu. Jak to w jeździe szosowyj bywo - zdjyncia idzie cykać, jak sie mo jakokolwiek pauza. Wiync dzisio bez rewelacji :P

Trowa i te sprawy © gustav

Świynto Ana od strony schodów :D © gustav

Po konsumpcji prziszoł czos na ewakuacjo. Zjechali my innom stronom. Asfalt tragiczny. W bidonach miołech liter cole i woda, a w kaspie 1 banan (teoretycznie powinno styknyć). Tympo było dalij doś mocne, ale niy sprinterskie :> Dzisio mi sie udało pobić rekord na 100km - 3h i 6min :) Musza zyjść poniżyj 3h - tyż taki mały cyl na tyn rok. W okolicach Kuźnie Rac.:
- 3 towarzyszy pognało w strona Raciborza
- 1 towarzysz musioł zrobić pit-stop'a :/

Bez nastympne prawie 20km jechalimy zmianami doś żwawo, ale direkt pod pieroński, mocny wiater. W Rybniku już w zasadzie było tympo rekreacyjne - czuć było wyraźni, że na skromnym paliwie z Anaberg niy zajadymy du dom na 100% mocy. Ogólnie trip jak najbardzij udany, w mocnym towarzystwie :) W szłapach 140km takim tympym to porównywalnie jak jakiś 300km ze średniom ~25.