Wczorajszy Tour de Rybnik to był w moim życiu piyrwszy wyścig z kimś innym, niż "jo som" i ogólnie jakikolwiyk piyrwsze zawody, w kierych uczestniczyłech. Dzieje sie tak, że w 99% przipadkach jeżdża som i nie było okazji wcześnij z kimś porywalizować... Może sie to kiedyś zmiyni heheh.
Wiync tak: wziołech w tym udział, bo chciołech po prostu sprawdzić, jak wyglondo mojo forma "sprintera" na tle ludzi, kierzy ścigajom sie na co dziyń (jo na chwila obecno "specjalizuja sie" w trasach pod ultra-maratony, a w tym roku yno ze 3-4x zrobiłech sie tryning jazdy na czas, aż wstyd sie prziznać hehe). A 35zł to niy ma dużo, wiync zaryzykowołech.
Mój wyścig (6x9km, kat. Orlik) był zaplanowany na godz. 11:00. O 9:20 zjodłech na śniadanie ryż do oporu. Od rana padało, niy jakoś ulewa, ale roz mocnij, roz słabij. Na termometrze jakiś 15'. W jednym z bidonów miołech koktajl kawowy (ponoć lepij uwydatnio energia). Do linie startu miołech z doma prawie 6km, wiync spokojnym tympym sie pyndalowołech, a jeszcze po drodze wbiłech do biedronki po czekolada i liter izotoniku. W biurze zawodów dostołech numer 68 (byłech blisko hehe). Tam tyż wypiłech mojo kawa, zjodłech pół czekolady i wlołech zakupiony izotonik.
Wybiła 11:00, wszystkie koksy z żółtodziobym gustavym w składzie (było ich w sumie 48) wjechali na linia startu. Dalij padało. Dalij odczuwołech chłód, mimo, że miołech koszulka termo + koszulka kolarsko. Bodajże dyrektor wyścigu coś tam fandzolył o zasadach przi tych, co sie ustawiyli na samym poczontku (jednocześnie jakiś inny gościu nawaloł do mikrofona), wiync my tam ze zadku nic niy usłyszeli o tych zasadach... Ale MOJI zasady brzmioły: niy dać sie zdublować i niy uszkodzić mojigo koła! :D I w końcu my wystartowali! Udało mi sie przebić do środka stawki. Drogi mokre, wiync na zakryntach w miara JESZCZE ostrożnie. Po jakiś 3-4km jo sie dalij dziwia, że jeszcze mi niy odjechali (możliwe, że sie jeszcze dogrzywali abo co hehe). No ale dojechalimy do bardzo niewygodnego sektora (wg map yno, abo i aż 2km)... Drogi niy równe, kilka zakryntów 90-cio stopniowych, wszyndzi mokro, wiync postanawiom przejechac go ostrożnie, żeby nie zaliczyć na samym poczontku jakijś niemiłyj kraksy. No niestety, takich jak jo było tela co nic i jak wjechołech na droga, kiero szła prosto do mety (ul. Rudzka), to już cały peleton był jakiś hmm 200-300m na przodzie. Jechołech wiela szło, ale już niy było szans ich dogonić eehh... Po 1. kółku dogoniłech jednego kolarza z mojij kategorie (wtedy miołech średnio 38 i coś), co tyż nie doł jakoś rady i postanowilimy, że jadymy na 100%, żeby nas nie zdublowali i ewentualnie, żeby kogoś dogonić. Jeszcze w oddali było widać ostatnich z peletonu i jakiś tam nadzieje były... Ale na nadziejach sie skończyło. Im wiyncyj my we dwóch przejechali, tym jeszcze wiyncyj przejechoł peleton. Po 2. kółku miołech momentami dość, ale wiedziołech, że momy szansa dojechać do mety przed upływym limitu czasowego, byle mieć średnio w granicy 36! I tak my sie zmiyniali na prowadzyniu (jechać direkt za kimś na kole to je fest różnica w oporach powietrza, a tym bardzij w peletonie). Niymniyj jednak te zmiany były mało profesjonalne; zakłodalimy, że sie bydymy zmiyniać co np. 2km. abo 2min., a wychodziło różnie, od sytuacji idzie pedzieć heheh. Przestowało padać tak kole 4. kółeczka. Ale dalij było te 15' na liczniku. Jo już koszulki podciongołech na wiyrch i rynkawy tyż, żeby zwiynkszyć chłodzynie. Normalnie żałowołech, że ubrołech ta koszulka termo na siebie. Nawet polywołech sie tym, co miołech w bidonie :D Ale to yno ukazuje, jak my zadupcali hehe. Średnio prawie prawie 36, wiync jeszcze wporzo. Kajś przed 5. kółkiym dogoniomy jednego typa i on sie doklejo do nos. Ze 2km dalij mijomy drugigo, ale on już chyba nie dowoł rady kondycyjnie. W czasie jazdy widziołech pora kolarzy pyndalujoncych kajś abo stojoncych na chodniku, wiync abo mieli jakiś problymy, abo jechali zapisać sie na kolejny wyścig. W połowie ostatnigo kółka naszo trójka doganio wóz techniczny, chyba z jakimiś syndziami; jo coś tam usłyszoł, że chyba jeszcze sie mieszczymy w limicie czasowym, ale muszymy zapierniczać! Jechali my na maxa, jednak już z przekonaniym, że bydymy na mecie jako ostatni. Wiync w geście solidarności postanowilimy, że wjadymy na meta równo obok siebie. I tak sie tyż stało :) Na mecie były brawa, multum fotoreporterów, kierzy robili nom tyż jakiś fotki. Miłe uczucie :)

Moji dane z licznika:
Dystans - 54,5km
Czas - 1h 31min i groszowe sekundy (chocioż w oficjalnych wynikach miołech 1h 31min i 50s)
Średnio - 35,6km\h (jednocześnie poprawiełch swój rekord o 0,5km\h na podobnym dystansie hehe)
Vmax - 54km\h

Oficjalnie naszo trójka była na 30. miejscu z 48 zawodników (za nami już żodyn nie przijechoł, prócz tego wozu technicznego). Stracilimy do tych piyrwszych na mecie 11min. Gościu na 29. miejscu stracił 7min. 39s. A gościu na 22. stracił już yno 1min. 36s.

Musza prziznać, że w ogóle nie byłech głodny, a nawet czułech sie na siłach, że mógbych zrobić jeszcze niejedno kółeczko :)

Ogólnie mój plan zostoł wykonany. Jo cały, koło całe, nie zdublowany i zakwalifikowany :) Jakbych na 1. kółku od razu pojechoł na som przodek stawki, to mone bych coś tam lepszego ugroł w perspektywie całego wyścigu. Ale np. jak kiery by do mie wjechoł (abo odwrotnie), to bych na 200% żałowoł... Mimo wszystko walczyłech do końca i uważom swój udział za udany :) Raczyj w pro-wyścigach niewiele zdziałom (tu jednak trza mieć przede wszystkim kasa abo sponsorów, bo jak sie uszkodzi swoji koło, to koszty mogom być nawet spore). Wiync dlatego jeżdża som i "ostrożnij", ale daleki trasy.

Koło uwalone całe z piosku i inkszego marasu, a jo jak sie zejrzoł w doma w lustrze, to chobych z gruby prziszoł :D

Swoich fotek niy mom, ale fotoreportery co chwila mi jakiś cykali, jednak za cholera niy umia ich znalyźć na necie eeehh. Ale jak co znajda, to zaro sam wciepia :)

edit: piyrwsze foto już znalozłech! :D



x6