Dzisio musiołech se wybrać kajś na koło, na dalszo jako rajza, bo ostatnio jeżdża yno kajś po mieście i okolicach z rozmaitymi sprawami. Pogoda ostatnio trocha ciulato - abo za zima, abo za fest wieje, dzisio to nawet po lekku sipiało, ale jak w końcu przestoło, to żeh już zdecydowoł na 100%, że trza kaj pojeździć. Miołech do zaliczynio 2 gminy przi granicy z Pepikami na Opolszczyźnie i dodatkowo od jakigoś czasu chyntnie bych zjod jakigo fastfoda (bo na co dziyń tego nie jym, przez to som zy mie same kości i jak jada we wichurze, to niy umia utrzimać balansu na kole). Wyjyżdżom przed 16:00, temperatura prawie 20'. Na obiod 1,5h pryndzyj jodłech ryż z warzywami, wiync jakiś zapas energetyczny był. Podczas jechanio temperatura oscylowała w granicach 16-18', wiync trocha było to niykorzystne dlo gardła, ale dało sie wytrzimać. I se tak pomału dojechołech do Raciborza i potym dalij w strona nieodwiedzonych jeszcze gmin. Tam kajś w sklepie kupiłech 2 bułki i 2 prince polo xxl. Tamtejsze drogi - szału niy ma. Dopiyro, jak wjechołech w Głubczycach na krajowo 38, to sie zaczoł piykny asfalt :)) W tych okolicach same chopki - zjaździk, podjaździk, zjaździk, podjaździk... Ale jak słońce zaczyło sie schroniać za horyzont, to żeh fest żałowoł, że niy miołech ze sobom aparatu... :/ PIYKNE WIDOKI!
W drodze powrotnyj w Rydułtowach spotkołech kumpla z klasy, pogodali my chyba ze 20min. W międzyczasie podjechoł jakiś kumpel mojigo kumpla Maluchym. I tyn kumpel mojigo kumpla se chwolił, że przijechoł z Krakowa tym autym za prawie 15zł, ponoć to mioł na gaz hmm. A tyn Maluch mioł cyntralny zamek, uwierzycie? :D
Dobra, skończyli my gotka, jo zejrzoł na zygor - 20:45. Ooo pierona, tera do kieryj je otwarty tyn fasfod z rozmaitymi fastfodami? - se myślołech. Zakłodoł żeh, że do 21:00 wiync gipko zadupcom na cyntrum Rybnika. Som Cancellara by se niy powstydził :D Co ciekawe, temperatura góra 15', a jo nie odczuwoł tego zimna; nawet gardło nie bolało. O 20:59 podjechołech pod fastfoda i już gasili światła. ZAMKNYTE! Ale żeh se wnerwił. A głód miołech pieruński... :/ No nic, w doma żeh se zrobił 2 talyrze zapiekanek hehe.

Od dzisio przechodza na prawie ślonsko wersjo bloga :> Prawie - bo całego słownika ze ślonskimi słówkami na pamiyńć nie znom :D
-