Poszłech spać kole północy, budzik miołech nasztelowany na 4:00. Obudziłech se i żeh był tak pierońsko niy wyspany, że szok. Ślypia mi se tak klejiły, chobych jechoł już ze 20h na kole i to nocnom porom... Obejrzołech bez okno, jako to tam pogoda wyglondo. Cima i zima pieruńskoooo! Na termometrze kole 1'... Stweirdziłech - chyba dzisio nici z "gminobranio" (rajza zaplanowano jakiś 300km) :\ Lygłech se nazot pod pierzina i leżołech i leżołech. I myślołech - zaś mom te wszystki zimowe mantle oblyc, a potym w trasie, jak se ociepli, wciepać je do tasze i tachać to poranoście godzin na puklu?? Jak jo tego niy lubia. Już prawie zasypiołech, ale z drugij strony szkoda mi było niby fajnyj pogody bez dziyń w ta sobota. Gminy se same niy zdobyndom! Ale dalij miołech wontpliwości. A wlozłech se na androidowy bajkstats i poczytołech se swoji abo od znajomych zimowe relacje. A tam teksty typu: gustav rybnicki terminator. Ale żeh se tym podbudowoł. Zrobiłech 800, a boja se jechać ze 3 godzinki w mrozie? Niy ma wymówek! Wstołech na nogi (już była kajś 5:00 heheh trocha mi to zetrwało)  i zaro do kuchnie poszłech warzić ryż! To oznaczało yno jedno - że wyruszom! :D Oblykłech se trocha cieplij, niż tydziyń tymu, no i wziyłech ochraniacze na szczewiki.
Wyjechołech 6:35
Na niebie niy za dużo chmur - to oznaczało fajno pogoda kole połednia. Tympyraturka z każdymi kilometrami maloła, ale pyndalowało se o dziwo fest dobrze :) No ale już przed Gliwicami było najzimnij.

Ojj zimaaa jeee © gustav

Przed Gliwicami © gustav

Już przed 9:00 była cołkiym piykno pogoda! ^^ DW 907 - takij drogi na szczeblu wojewódzkim to ze świycom szukać. Standard co najmij jak u DK-ów.

DW 907 - bombon! © gustav



:D :D


DW 907 - kajś indzij © gustav

Cołki czos jechało se elegancko, no i corozki cieplij było :)) Wiatru tela, co nic. Średnio ponad 26.

Popów - czyli gmina na Ślonsku wysuniynto najbardzij na północ.

Popów, czyli sam żeh był © gustav

Jeśli chodzi o jedzynie - wzglyndym rajzy z zeszłego tydnia, to dzisio mi sie już niy chciało jakoś tak co chwila jeść. Może przez to, że jodłech systematycznie hmm

Wpierniczanko © gustav

Po południu już dużo chmur se zebrało na niebie, momyntami dość chłodnawo na postojach, ale podczos jazdy optymalnie.

2  wschodnie gminy z Opolskiego zebrołech "po drodze" :D

Opolskie wita © gustav

I UWAGA, co jo zejrzoł :D
Ale te Opolski Jaworzno to je nicość. Tam som yno pola, drzewa i 3 chałpy na krziż. Prawdziwe Jaworzno je na Ślonsku, niydaleko Mysłowic!! Tam, kaj miyszkajom BS-owi krejzole; tam, kaj sie z nudów cyko słitaśne fotki na rondzie im. jakigoś metalowca :D (niy wiym, niy znom sie). Niywtajemniczonych zapraszom sam: Jaworzno i te sprawy
Ślonski Jaworzno - niy odwiedzisz, niy pojmiesz! :P

Jaworzno - miasto, kaj... :D © gustav

No i tak se po wsiach krynciłech, zbiyrołech kolejne gminy, a w miyndzyczasie słuchołech mjuziku i jodłech np. suche żymły (jedna to tak jodłech bez 5km hehe).
Potym zaś pogoda se poprawiyła! :)) I dalij jechało se dobrze, bez ŻODNYCH kryzysów :P

Szpan na polach © gustav

Jakoś dróżka © gustav

DK 11 - wiadukt © gustav

DK 11 - nic yno pyndalować! © gustav

Zachód słońca © gustav

Słońce w brylach © gustav
Przed Pyskowicami miołech jeszcze ponad litr wody smakowyj, 3 żymły i prinsa polo :> Teoretycznie powinno styknyć du dom, bo cołki czos mi se fajnie krynciło i niy byłech głodny. A tyż postanowiłech trocha obniżyć obroty. W Gliwicach już byłech pewny, że tympym ekonomicznym dojada w dobrym stanie hehe. Śpiychać se niy musiołech. A i zakupów miołech dość na dzisio - styknie, że kupiłech banany za prawie 7zł za kilo...

Już w Rybniku © gustav
 Dojechołech du dom bez szwanku, Była 21:30 i kole 7' na licznku, a mimo to czułech czasym zaduch. Mone za fest pooblykany byłech :D Kryzysy? Boloł mie przez jakoś godzina, może dwie kark, jak jecholech nazot w strona Gliwic. A tak to wszystko cacy ^^

+12 nowych gmin

Jeśli chodzi o Ślonsk - do 100% zostoł mi YNO jedyn kurdupel w okolicach Żywca, gmina Koszarawa. Wstypmnie planuja podjechać tam w prziszły weekend, kto chce zy mnom świyntować zdobyci cołkigo województwa - zapraszom. Bydzie biesiadno kapela, 3 tiry z krojonym chlebkiym, 17 ton bananów z wysp Manganos i paleta wód w baniokach 5-litrowych :>

Pokaż trasę GPS

Plac Wolności © gustav

Drugo mojo tegoroczno jazda z kimś. Koło miołech wypucowane na glanc, kieta naszmyrowano i czyściutki strój BS. Nic yno jeździć :))  Przijechołech na ustalono godzina na plac wolności na 16:30. Szpan na mieście, bo w około fol ludzi przełaziło hehe. Kurde ale trocha z północy ciymne chmury było widać, ale myśla, że nos to ominie. Zarozki pojawił sie Maciej i ustalomy trasa do Rud i na Knurów, tympym niyszaleńczym. Przejechali my góra kilometr, to zaczyło kropić... Kilometr dalij to już dużo bardzij kropiyło. Po 3 kilometrach to już jo był zmoknyty pierzińsko. Uwalony tyż. O kole niy wspomna... Wszystko było taki lśnionce poranoście minut tymu!!! Zdołowołech sie bez tyn dyszcz, ale jechali my swoje. Za Rudami dołonczył do nos inny kolorz i przez pora km'ów my doś ostro pyndalowali. Może ze 3-4km przed Knurowym już my zwolnili tympo, żeby co pogodać hehe. Owy kolorz skryncił du dom, a my w strona Rybnika. Mój napynd już groł orkiestra... :D Suchy jak Strasburger i jego wice hehe. Podjechalimy na myjnia rynczno, kaj Maciej se umyło koło, a jo woloł se to na spokojnie w doma zrobić :) Mimo deszczowyj aury sie fajnie krynciło.

...czyli próba prziwrócynio do życio jakigoś koła od bajtla somsioda somsioda somsioda mojigo somsioda, fachowo to se nazywo - klient :)) Stykło kupić yno linka przerzutki, komplecik klocków i nojważniejsze - zadnio przerzutka (bo pierwotno była rozdupcono we wszystki strony świata... :D). Po za tym cyntrowani, smarowani w piastach, zabawa z niy działajoncym amorym z przodu, regulacje itp. Onaczyłech se z tym w sumie jakiś 7h, wszystko w miara terozki fajnie śmigo, jeszcze jutro musza zrobić jaki test po terynach heh

GustavService :D © gustav

Niby stare, ale pierońsko sie uśmiołech :D :D

http://joemonster.org/art/5955

Przi takij muzyce to idzie jeździć! :>

Trocha mie wyciu%#li te prezyntyry pogody, ale majom szczyńści, że niy mom dzisio żodnych niyporzondanych skutków zdrowotnych tyjże rajzy, to znaczy - niy ma żeh uciompany, niy zdychom w wyrze itp. Ale o tym późnij.

Otóż te prezyntyry zapowiadali na sobota do 15' i pochmurnie, ale bez dyszczu. Co za tym idzie - czos na nowe gminy! :D
W sobota poszłech "spać" o piyrwszyj w nocy, a już na 3. godzina miołech nasztelowany budzik. Ryż i te sprawy i wyjechołech o 4:20. Do Gliwic pyndalowało sie elegancko, niby 7,5' ale bez uczucio zimna.

A4 w Gliwicach © gustav
Ale im bliżyj Tarnowskich Gór, tym corozki zimnij sie jakoś mi robiło, a nojbardzi to w szczewikach (a miołech 3 pary zimowych fuzekli oblyczonych!!). Żyłech nadziejom, że im bliżyj połednia, tym bydzie corozki cieplij (6.2' to była nojniższo tympyratura...nawet o 8-9 rano). Ale na ocieplyni trza było sporo poczekać :/ Fest dużo piłech, jakoś tak dusznawo było momyntami, mimo chłodu. Ale musiołech robić pauzy, żeby z taszy wyciongnyć jedzyni, głównie chlyb - niykrojony! niy szło se go wsadzić do kapsów ze zadku koszulki kolarskij, bo był doś wielki. Już wiyncyj takigo niy kupia.
W Siewierzu musiołech kajś tam zrobić pauza, bo trza było luknyć na gps-ie położyni hehe w Gliwicach dopiyro se kapnyłech, że niy wziyłech mojij mapy :D

Siewierz - okolice © gustav
Majonc przejechane "yno" 113km, ukozała se piyrwszo nowo gmina z 10 planowanych do zdobycio. Tam było fest dużo chopek, bo to były graniczne teryny Jury.

Piyrwszo gmina! © gustav
W szczewikach ta lodówka mie już tak nerwowała, że musiołech jakoś zareagować! Powsadzołech jednorazowe worki po zakupach miyndzy fuzekle :D

Patynt na lodówka w szczewikach © gustav
I jak sie okozało - jakoś poskutkowało! :P Niy, żeby jo mioł grzejnik abo co w środku, ale ogranyczył sie przepływ zimnego luftu w taki sposób, że szło już kryncić w miara komfortowych warunkach ;)
Kajś tam w Koniecpolu już było kole 13', a było przed 12:00. Miołech zrobione 140km. Średnio 23 z groszami... A czamu tako mizerno? Bo cołki czos od Tarnowskich Gór jechołech direkt pod pieroński wschodni wiater.. Czasym tak wioło, że jak miołech 25km/h na prostyj, to czułech sie wniebowziynty.

Koniecpol - tory © gustav
No ale już na Częstochowa jechołech w bardzij płaskim terynie i z wiatrym.

Karel-focia :D © gustav
Potym kajś na przistanku KOLEJNO pauza. Jak jo tego niy lubia. Do tego momyntu miołech wiyncyj pauz, niż jeżdżynio, tak to idzie pedzieć.

Pauza nr 274 © gustav
Musiołech kierować sie na Mykanów, na północ od Cz-owy.

Lotnisko przi DK1 © gustav

Tam też byłech :P © gustav
Była okazjo jechać na Cz-wa DK1, ale na nij był zakaz dlo kołów... Musiołech jechać bocznymi dróżkami.
W Cz-wie w cyntrum niy wiedziołech, kaj jechać, musiołech wspomóc se gps-ym. Chciołech podjechać pod Jasno Góra, to policja jakiś objazy robiła. Już niy chciołech kombinować, jak se tam dostać, wiync kierowołech sie prosto na wylot na DK1. Tam był zakaz zaś, ale te 2km do DW 46 jakoś przejechołech bez szwanku. Niy miołech innego wyjścia hehe.
Droga do Olsztyna spoko, zaczyły sie zaś chopki.
Gryfny widok był w drodze do cyntrum Olsztyna - jedziesz w dół i direkt na prosto wyłanioł sie zamek :))

Zamek w Olsztynie © gustav

Podjazd w Biskupicach © gustav
Potym to już do miejscowości Poraj i sekwyncjo 3 nowych gmin na krótkim odcinku aż do DK1 :)
Dojyżdżom do DK1 i tam.. niy ma zakazu!!! :D KLASA!
Jada niom aż do miejscowości Koziegłowy, kaj odbijom w strona DW908 biegnoncyj do Tarnowskich Gór. Miejscami leciutko kropi, prawie że niyodczuwalnie, wiync spoko :)
Za Gliwicami ostatnio pauza, jakiś 20km du dom.

Sam jeszcze sucho... :D © gustav
Czułech sie bardzo dobrze ogólnie (chyba za fest ekonomicznie jeżdża, przez to tako średnio). Jedzynio mi troszka zostało, wiync o kryzysie głodowym niy ma mowy. Temperaturka jakiś 10', było przed 21:00 i już niy kropiło.
No dobre, trza żić ruszyć i jechać :D Kajś 2km od tego przistanku zaczynało zaś kropić. Luzik. Yno, że corozki mocnij kropiło!!! No by to szajs kurde.. Dyszcz se zrobiył grr zaro mi sie wspomniało, jak pod koniec zeszłego roku przi podobnyj tympyraturze w Gliwichach chyciła mie konkretno ulywa... była masakra wtedy, cały przemoczony :/ Miołech nadzieja, że powtórki terozki niy bydzie. Padało "optymalnie", czyli szło to jeszcze wytrzimać na tych ostatnich 15km. Żeh zapierniczoł konkretnie, zero wymówek. Dobrze, że na przistanku pojodłech se, bo inaczyj by mie odciyło po może 5km. Ponad 320km zrobione i na koniec czasówka hehe. Dobrze, że miołech worki we fuzeklach, to żeh tak tego przemoczynio ich niy odczuwoł. W cyntrum Rybnika już niy padało, yno drogi mokre. Średnio mi podskoczyła przez tyn dyszcz o 0,2-0,25km\h ^^ O 21:40 jakoś byłech w doma. Prawie odciynty :D Musiołech gipko co pojejść hehe.

10 nowych gmin do kolekcji (czyli powiat myszkowski i częstochowski po 100% już). Na Ślonsku pozostało mi ich jeszcze 11, na Opolszczyźnie 14. Jak dobrze pójdzie, to do końca kwietnia bydzie 2x100% :)

Pokaż trasę GPS

Rundka do cyntrum i nad zalyw, polansować se wypucowanym na glanc kołym hehe :> Bez żodnego naginanio tympa.