Przijechołech po 300km do chaty, społech 6h, potym czułech se niyźle, a nawet w miara rześko, ale po godzinie zaś mie zmulyło :D I zaś społech kajś do 6:30 hehe Bo do roboty trza było se wstawić... W robocie już po 5h żeh mioł taki czerwone oczy ze zmynczynio, ahh niy ma co godać; a jeszcze kolejne 5h musiołech strzimać! Se wyobraźcie mój stan po np. 9h. Wszyscy już mi godali, wielach wypił ostatnij nocy :D A jo (ledwo kontaktowołech już), że na kole se pyndaluja po okolicy "po szychcie" hehe. Prziszłech z roboty, to od razu lygać. 12h spanio to już styknie, żeby se zresetować :>

Czyli spontaniczno rajza do Czynstochowy, ale trocha okrynżnom drogom - bo bez Opole :D Spontaniczno - bo jeszcze przed szychtom byłech ugodany na niedziela rano popyndalować z kolorzami z okolic. Ale jak już oblykołech se du dom, to coś mie nachodziło, w synsie dupnyć jakigoś hardkora, jakoś 3-setka, direkt po przijściu. Dodatkowo kieryś mi padoł, że jo tego niy zrobia - no to se zmotywowołech i heja. Wbiłech do tesco po jedzyni, czyli chlyb. W sumie jakiś 700g w takich malutkich kraiczkach. Dlo odmiany - niy na sucho :D :D


No i wyjechołech o 23:58. Moji lonty dobrołech idealnie. Pyndalowało se rychtyk cacy hehe. Na Racibórz wiadomo - drogi ciulate, ale było bez ruchu, wiync jakoś poszło. Miołech stare baterie w lampce i to był jednak abfal... Jeszcze do Opola było droga w miara widać...


Na jakijś tankszteli w Krapkowicach, jak wpierdzielołech chlyb, podjechała kole mie audica, otworła se szyba i gościu z pytaniym, kaj jada itp. No i życzył mi szczynśliwyj drogi. Kurde fajno sprawa :) No nic, ruszyłech. Było corozki zimnij.


Noo jo na liczniku mioł najmynij 6,5'. ALE w szczewikach o dziwo czułech ciepło. I mojo kominiarka jako tako dowała rada, chocioż myśla, że poniżyj 8' to już czopka [np. zimowo] by była okej.
Jeszcze po drodze zrównało se zy mnom zaś jakiś auto, zaś otworli szyba i zaś z tekstami kaj jada hehe Gościu mi padoł, że jo jak tak jeżdża, to jeżeh... fachowiec w tyj dziedzinie.
Jedyn z lepszych tekstów, jaki żeh usłyszoł w ostatnich czasach :)

Sam już w Opolu.


No i już po porunastu km'ach w strona Jasnyj Hołdy odczuwołech kryzys. Kurde tak mi moc spodła, że jo piernicza. To, że teryn szoł na wiyrch, to tam kij, ale tak mi se ciynżko pyndalowało, no że niy wiym... A średnio do tyj pory miołech prawie 27. Czyli nic specjalnego po jakiś 120km. Dodatkowo mojo lampka to już ledwo dychała. By niy biołe linie na drodze, to byłbych w żici. Ale jakoś se kulołech. 



Nojwiynkszy paradoks tyj rajzy - zaczyło mie se robić zima w szczewikach dopiyro, jak zaczyło se robić jasno. Ciykawe.
Mniyjwiyncyj 30km od cylu zaś mie sie gryfnie pyndalowało. Niy wiym, czy to zasługa świyntości tego placu, czy dopiyro od tyj pory zaczyły działać moji sproszkowane koksy :D



Już du dom trasa była w zasadzie pod wiater. A chyba wioło tak z S-E. A jo? Pyndalowoł pierońsko leciutko :D Moce z Niebios + koksy i idzie jechać w kożdych warunkach hehehe.



W Gliwicach jeszcze na tanksztela odwiydzić znajomego. W sumie ze pół godziny minyło. Powiym tak, niy byłech głodny, ale że du dom jeszcze było 30km, no to wolołech coś wpierdzielić, bo odetnycie może prziś w kożdyj chwili heh. Tymbardzij, że te 30km to same chopki. Kupiłech w "promocji" (łosz ciuuul) 2 snickersy średni za 5zł. No ale co zrobisz? Nic niy zrobisz.



Ruszyłech z nadziejom, że dojada bez wyplompanio :D No bo moce z Niebios + koksy + co by niy pedzieć, snickersy... :D

Noo i dojechołech w dobrym stanie, ale fest zmynczony, bo to już ze 30h bez spanio. Oczy i morda czerwone, jak lonty z bikestata :P
W doma byłech o 14:25 jakoś.
Zjodłech te chlybki, banana, mało pizza, 2 snickersy i 2 prince pola. Chyba bez tragedie hehe.
Pokaż trasę GPS

Jutro fraja od roboty i pogoda bombon. Ale nikaj jutro niy wyrusza. Bo uczynia to jeszcze dzisio, przed 23:59. Chlyb krojony już żeh kupiył.